Bo ta un maestro cu ta traha den enseñansa regular of un profesional den campo di enseñansa y bo ta desea di specialisa bo mes den educacion, specificamente desaroyo di curiculo, of instruccion y didactica? Bo kier mehora e calidad y rendimento di bo practica di enseñansa door di haci investigacion cu metodo y tecnica cientificamente proba, ademas aplica y investiga esaki den practica? E ora, Master of Science in Education (MSE): Curriculum & Instruction - Instructional Leadership lo ta un estudio sumamente interesante p’abo. E master aki no ta uno tradicional. E variante cu IPA ta ofrece lo ta esun di Community of Learning. Den e master aki, profesional den enseñansa lo ricibi guia di dos facilitador pa yega na conocemento mas profundo den diferente aspecto di nan practica profesional. Na januari 2021 Instituto Pedagogico Arubano (IPA), den colaboracion cu Wayne State College di Nebraska, ta introduci un master nobo. Den e estudio master practico aki bo ta siña hopi mas riba tereno di educacion, instruccion, desaroyo y didactica pa duna forma na enseñansa di siglo 21.

Sea cu bo ta bini di enseñansa primario, avansa, profesional of superior, of ta traha den un area relevante den enseñansa na Aruba, cu e programa aki bo por enfoca riba profesionalisacion y specialisacion den bo propio area. Na final di e estudio e graduado ta ricibi un diploma master reconoci di Wayne State College.

Pa por participa na e Master of Science in Education Curriculum and Instruction mester tin: 1. diploma na nivel HBO of WO y ta certifica pa duna les den enseñansa; 2. experiencia den enseñansa cu un minimo di tres aña; 3. of certificado pedagogico didactico cu minimal 5 aña di experienca den campo di enseñansa.

Si bo no ta para dilanti klas actualmente bo lo mester percura pa acceso na un scol p’asina bo por cumpli cu e tareanan di e estudio.

Den cuadro di e asina yama ‘Get to know IPA’, e instituto lo tene un live session di e estudio di Master of Science in Education dia 12 di november pa 7or di anochi riba e pagina di Facebook Instituto Pedagogico Arubano. Durante e live session lo elabora riba e contenido di e estudio, rekisito y procedura pa inscribi.

IPA ta invita tur maestro, docente y profesional den enseñansa cu ta interesa pa haci e estudio Master of Science in Education pa ‘like’ e pagina di Facebook Instituto Pedagogico Arubano, p’asina participa na e live session. Tambe pa keda na altura di tur informacion di ‘Get to know IPA’.

Pa mas informacion por bishita nos website www.ipaaruba.com of pagina di Facebook ‘Instituto Pedagogico Arubano’ y si ainda tin cualkier pregunta, por tuma contacto cu Studenten Services na 5243100.

E curso di Certificacion Pedagogico Didactico (PDG) ta un curso parcial pa e profesionalnan cu kier ta competente den e profesion di docente of educador. Pa medio di e curso di PDG e profesionalnan por desaroya competencia pedagogico y didactico. E graduado di PDG por duna un materia na enseñansa profesional y scol avanza. E curso tin un duracion di 2 aña y cada un ta consisti di 4 blok. E cursista lo haya les dos biaha pa siman na Instituto Pedagogico Arubano (IPA) y, pa motibo di e situacion actual, por siña online. Banda di esaki lo tin tarea pa haci na cas, na scol, online y tarea practico. E curso di PDG lo cuminsa na januari 2022.

Tin dos grupo di participante cu por haci e curso di PDG: 1. maestro cu ta traha ‘onbevoegd’ den enseñansa avanza e.o. EPI y MAVO. 2. profesional di otro sector e.o. empresa of instancia cu no ta enseñansa, cu tin interes y motivacion pa sa mas di e profesion di educacion, y cu kier traha riba nan conocemento y habilidad pedagogico didactico. Pa e grupo di profesional aki PDG ta un rekisito pa drenta sector di enseñansa.

Den cuadro di e asina yama ‘Get to know IPA’, e instituto lo tene un live session di e curso di PDG dia 9 di november pa 6or di atardi riba e pagina di Facebook Instituto Pedagogico Arubano. Durante e live session lo elabora riba e contenido di e curso di PDG, rekisito y procedura pa inscribi. Alabes lo tin cursista di PDG presente, un ‘zittende leerkracht’ y un ‘niet-zittende, leerkracht’ p’asina comparti nan experiencia di e curso.

IPA ta invita tur persona cu ta interesa pa haci e curso di PDG pa ‘like’ e pagina di Facebook Instituto Pedagogico Arubano, p’asina participa na e live session. Tambe pa keda na altura di tur informacion di ‘Get to know IPA’.

Pa mas informacion por bishita nos website www.ipaaruba.com of pagina di Facebook ‘Instituto Pedagogico Arubano’ y si ainda tin cualkier pregunta, por tuma contacto cu Studenten Services na 5243100.

Enseñansa duradero y cu sentido

IPA ta duna recapacitacion y profesionalisacion bao di direccion di departamento CDPC. CDPC ta para pa Centro pa Desaroyo Profesional Continuo. E departamento aki ta encarga cu enseñansa pa tur maestro y docente, cuminsando di scol preparatorio te cu scol superior. CDPC ta ofrece actividad innovativo di siñamento y desaroyo pa maestro y docente, profesional den educacion y tur actor den scol. Di e forma aki ta profundisa y amplia conocemento, habilidad y actitud profesional directamente relaciona cu e profesion di maestro.

Durante aña escolar 2018-2019 CDPC a investiga e aspecto di necesidad bao campo di enseñansa. For di e investigacion a sali na cla cu directiva di scol, cabesante, director, maestro y docente ta haya cu pa enseñansa na Aruba ta sumamente importante pa sigui profesionalisa riba:

• tereno di ICT y digitalisacion den enseñansa.

• cuido di maestro y docente

• cuido di alumno y studiante

• enseñansa y didactica den siglo 21

• maneho di scol y liderazgo

Teniendo na cuenta cu e resultado di e investigacion, CDPC ta organisa un serie di curso specialmente pa tur maestro, docente y profesional den enseñansa.

Den cuadro di e asina yama ‘Get to know IPA’, e instituto lo tene un live session di CDPC dia 12 di november pa 6or di atardi riba e pagina di Facebook Instituto Pedagogico Arubano. Durante e live session lo amplia, entre otro, riba kico ta CDPC y lo trata e cursonan di recapacitacion cu CDPC ta ofrece durante aña academico 2020-2021 y e procedura pa inscribi.

IPA ta invita tur maestro, scol y directiva pa ‘like’ e pagina di Facebook Instituto Pedagogico Arubano, p’asina keda na altura di tur informacion di ‘Get to know IPA’.

Pa mas informacion tambe por bishita nos website www.ipaaruba.com y si ainda bo tin cualkier pregunta, por tuma contacto cu Studenten Services na 5243100.

Desde IPA su inicio te cu awor, e instituto a conoce varios graduado cu a termina un of mas estudio cu exito y cu awo ta maestro competente y ehemplar den nos comunidad. Un di nos graduadonan ta cabesante juf Nadine Kirindongo. Juf Nadine ta cabesante di St. Franciscus College y ta graduado di e estudio pa maestro di Enseñansa Primario di aña 2000. Recientemente el a cumpli 20 aña di servicio na su scol y na SKOA.

Juf Nadine ta conta cu ora el a gradua di IPA, apesar cu el a cuminsa duna les den klas 2 e tabata dispuesto pa tuma e reto den duna les den cualke klas. Semper Nadine a dedica na desaroya su mes profesionalmente como maestro. Pa Nadine, no tin un limite di cuanto bo por siña. Tempo cu meneer Gerardo Figaroa tabata cabesante na su scol, el a dun’e oportunidad pa haci varios curso. Juf. Nadine a haci curso di entre otro ICT, Papiamento y ‘Prisma Cursus Nieuwe Stijl’. Despues di a termina e curso di Prisma, el a bira maestro di Prisma na su scol.

Despues di algun aña di experiencia y diferente curso tras di lomba, juf. Nadine a haya e oportunidad y confiansa di su cabesante pa bira e cabesante suplente. Juf Nadine ta menciona cu su desaroyo profesional no a keda te aki. Na aña 2014 a presenta e oportunidad pa haci e curso di ‘Educational Leadership for Collaboration’ ofreci na Universidad di Aruba y juf Nadine no a pensa dos biaha pa participa na e curso aki. Juf Nadine ta conta cu orguyo cu na 2015 el a haya e timon di su scol y a bira oficialmente e cabesante.

Como cabesante, juf Nadine ta kere fervientemente cu den cada paso di un persona su carera profesional tin cos nobo pa siña. Pa e motibo ey juf Nadine a scoge pa sigui ‘International School Leadership Program’ di Ontario Principal Council Canada na 2016 y na 2019 a sigui e post-HBO di Kind in Kracht voor Kindercoach y na 2020 ta logra esaki cu exito.

Juf Nadine ta comparti su trayectoria, pasobra prome cu un persona kier motiva su ekipo, e persona su bida, acto y pasion mester ta ehempel positivo. Juf Nadine a continua na bisa cu e sa e potencial di su coleganan y nan sa cu e no ta spera menos di nan. E ta elogia nan logronan y ta polish ora mester polish. E ta kere firmemente cu nos tarea como maestro di scol ta pa crea lider. Den esaki juf Nadine su tarea como cabesante ta pa vigila, motiva y sigui e desaroyo di e maestro y mir’e florece.

Juf Nadine ta termina bisando cu nunca tin limite pa loke ta trata logro den bida. Tuma tur oportunidad cu presenta bo dilanti pa por desaroya como profesional cu tur dos man. Nos no sa nunca si esey ta e unico biaha cu e lo presenta.

IPA ta duna recapacitacion y profesionalisacion pa medio di departamento CDPC. CDPC ta para pa Centro pa Desaroyo Profesional Continuo. E departamento aki ta encarga cu enseñansa pa tur maestro y docente, cuminsando di scol preparatorio te cu scol superior.

Den cuadro di e asina yama ‘Get to know IPA’, e instituto lo tene un live session di CDPC dia 12 di november pa 6or di atardi riba e pagina di Facebook Instituto Pedagogico Arubano. Durante e live session lo splica, entre otro, kico ta CDPC y lo trata e cursonan di recapacitacion cu CDPC ta ofrece durante aña academico 2020-2021 y e procedura pa inscribi.

IPA ta invita tur maestro, scol y directiva pa ‘like’ e pagina di Facebook Instituto Pedagogico Arubano, p’asina keda na altura di tur informacion di ‘Get to know IPA’.

Pa mas informacion tambe por bishita nos website www.ipaaruba.com y si ainda bo tin cualkier pregunta, por tuma contacto cu Studenten Services na 5243100.