Bo kier haci e estudio pa Maestro di Enseñansa Primario of Bachelor Nederlands als Vreemde Taal y no tin diploma sea di havo, vwo, GED of MBO/EPI nivel 4 pero bo tin minimo 21 aña? Ata bo chens! Tur persona cu tin desde 1 di september 2022 minimo 21 aña y cu kier haci un estudio na IPA pero no tin e diploma cu IPA ta exigi, ta bin na remarke pa haci e asina yama 21+ Toets. E 21+ Toets ta midi si un persona tin e nivel di havo cu ta necesario pa por studia na IPA. Tene na cuenta cu e 21+ Toets ta conta solamente pa e estudionan inicial cu IPA ta ofrece durante aña 2022-2023, esta e estudio pa Maestro di Enseñansa Primario y Bachelor Nederlands als Vreemde Taal.

E 21+ Toets ta consisti di 3 materia entre otro; Hulandes, Matematica y Hende y Comunidad. E test di Hulandes y Matematica lo tuma luga diasabra 27 di november y Hende y Comunidad diasabra 4 di december 2021. Si bo pasa e testnan aki cu exito, bo ta bin na remarca pa participa na un trayecto di preparacion pa e test di admision.

Pa informacion general di e 21+ Toets bishita e website www.ipaaruba.com y bay na aanmelden. Akinan lo bo haya diferente video cu ta contene informacion di 21+ Toets. Ta sumamente importante pa bo mira tur e videonan p’asina bo tin e informacion completo y ta bon informa. Alabes pa bo tin suficiente tempo pa por prepara debidamente y asina engrandece bo chens pa pasa e 21+ Toets cu exito.

Tur persona cu ta interesa pa haci e 21+ Toets por inscribi online via e website di IPA www.ipaaruba.com. Pa por inscribi mester cumpli cu e pago di AWG 80,- y pone como anexo un copia di e comprobante di pago den e formulario digital di inscripcion. E ultimo fecha pa inscribi pa e 21+ Toets ta diabierna 12 di november 2021. Despues di e fecha aki no por inscribi mas pa e 21+ Toets pa aña academico 2022-2023. Pa mas informacion por bishita nos website www.ipaaruba.com of pagina di facebook 'Instituto Pedagogico Arubano' of por tuma contacto cu Studenten Services na 5243100.

Bo kier haci e estudio pa Maestro di Enseñansa Primario y no tin diploma sea di havo, vwo of mbo nivel 4 pero bo tin minimo 21 aña? Ata bo chens! Tur persona cu tin desde 1 di september 2022 minimo 21 aña y cu kier haci un estudio na IPA pero no tin e diploma cu IPA ta exigi, ta bin na remarke pa haci e asina yama 21+ Toets. E 21+ Toets ta midi si un persona tin e nivel di havo cu ta necesario pa por studia na IPA. Tene na cuenta cu e 21+ Toets ta conta solamente pa e estudio inicial cu IPA ta ofrece durante aña 2022-2023, esta e estudio pa Maestro di Enseñansa Primario.

E 21+ Toets ta consisti di 3 materia entre otro; Hulandes, Matematica y Hende y Comunidad. E test di Hulandes y Matematica lo tuma luga diasabra 27 di november y Hende y Comunidad diasabra 4 di december 2021. Si bo pasa e testnan aki cu exito, bo ta bin na remarca pa participa na un trayecto di preparacion pa e test di admision.

Pa informacion general di e 21+ Toets bishita e website www.ipaaruba.com y bay na aanmelden. Akinan lo bo haya diferente video cu ta contene informacion di 21+ Toets. Ta sumamente importante pa bo mira tur e videonan p’asina bo tin e informacion completo y ta bon informa. Alabes pa bo tin suficiente tempo pa por prepara debidamente y asina engrandece bo chens pa pasa e 21+ Toets cu exito.

Tur persona cu ta interesa pa haci e 21+ Toets por inscribi online via e website di IPA www.ipaaruba.com desde dialuna dia 21 di juni 2021. Pa por inscribi mester cumpli cu e pago di AWG 80,- y pone como anexo un copia di e comprobante di pago den e formulario digital di inscripcion.

Pa mas informacion por bishita nos website www.ipaaruba.com of pagina di facebook 'Instituto Pedagogico Arubano' of por tuma contacto cu Studenten Services na 5243100.

Recientemente, Instituto Pedagogico Arubano (IPA) a tene su ceremonia di graduacion di aña academico 2020-2021. Cu orguyo, IPA ta anuncia cu awor nos enseñansa ta conta cu un grupo di 33 maestro cu lo reenforsa nos educacion na Aruba. E graduadonan tin diferente specialisacion, entre otro, Master Educational Needs, Pedagogisch Didactisch Getuigschrift, Movecion y Salud y e estudio pa maestro di Enseñansa Primario.

E studiantenan cu a gradua den aña academico 2020-2021 ta Master Educational Needs: Tahira Lopez, Sheila Tromp, Minerva Connor, Giovanni Leocadia, Mariela Maduro, Jeanira Wernet y Marjory Tromp. Pedagogisch Didactisch Getuigschrift: Stephanie Donata, Edseline Gomez, Melendy Neuman, Natalie Solognier, Suraika Tromp, Ralitza Werleman y Yhoely Willems. Movecion y Salud: Ruberch Lampe, John Leo y Dhany Tromp. Maestro di Enseñansa Primario: Iwert Gordijk, Yarina Leon, Zuleima Solognier, Chantal Tromp, Ricardo Winterdal, Franklin Adames, Adaeynah Bohorquez, Deanna Fingal, Tyfanny Garcia, Orchaira Gomez, Roselien Helder, Rocalia Lampe, Jennelle Martes, Michelle Mendes, Candy Noguera y Zarette Servud.

Durante e graduacion, directora general drs. Marilyn Richardson a dirigi palabra na e publico presente, specialmente na e graduadonan. Den su discurso, drs. Richardson a splica cu den bida tin diferente momento cu nos por categorisa como un momento inolvidabel y pa un studiante of cursista e momento cu e por ricibi su diploma ta un momento culminante pa clausura un capitulo importante y alabes cuminsa cu e siguiente. Keep blooming and growing tabata e tema di IPA su graduacion. Segun drs. Richardson, e graduadonan a demostra esaki door di supera e retonan cu a presenta durante nan estudio y cu dedicacion y tremendo perseverancia a logra e meta di bira maestro di scol. E mensahe cu el a comparti cu e graduadonan ta pa nunca stop di crece y florece y pa nan inspira esaki den cada mucha y hoben cu nan haya nan dilanti. Ta un ehempel pa nan y mustra nan e caminda pa nan semper briya y crece. Alabes, el a menciona cu e Plan di Educacion Nacional PEN2030 ta e instrumento cu como pais nos por uza pa conhuntamente traha riba mehoracion di nos enseñansa. PEN2030 ta para pa, entre otro, responsabilidad comun pa un enseñansa di calidad, ‘empowerment’, respet, mentalidad habri y curiosidad pa siña. Drs. Richardson a splica cu e graduadonan tin e base aki den nan formacion como maestro, pero awo ta keda na cada un di nan pa keda nutri e balornan aki p’asina carga e vision di PEN2030. Drs. Richardson a termina su discurso bisando e graduadonan cu nan ta drentando un fase nobo den nan bida y cu e kier recorda nan cu cada fase den bida ta rekeri un version diferente di nan. Esaki simplemente kiermen cu nan tin cu sigui desaroya nan mes constantemente p’asina por cumpli cu e demandanan nobo den nos enseñansa.

Den cuadro di e tema di graduacion Michelle Mendes, graduado di e estudio pa Maestro di Enseñansa Primario, a comparti su desaroyo personal den forma di un discurso inspirativo. Despues di un carera extenso den area di recurso humano y dos estudio tras di lomba, Michelle ta ricibi su di tres diploma. E mensahe principal cu Michelle a comparti ta: “Den bida nunca bo lo stop di crece y florece, si bo haci tur cos for di bo curason cu hopi pasion, dedicacion y perseverancia. Cada persona su crecemento ta diferente. Na momento cu bo stop di crece of florece tuma e tempo pa reflexiona pa despues bo sigui inverti den bo mes y sigui pusha padilanti. Mescos cu un mata sa di adapta y florece bou di cualkier circumstancia, bo por mas cu bo ta kere! Sea un lifelong learner y keep on blooming and growing.”

E anochi aki tabata uno hopi ameno, caminda e comunidad di IPA conhuntamente cu famia y invitado di e graduadonan a celebra nan logro den e Grand Ballroom di Aruba Marriott Resort & Stellaris Casino. E anochi tabata acompaña cu e tononan musical di Ron Steel Entertainment.

IPA ta desea tur colega nobo un carera fructifero y exitoso. Nos ta spera cu Todopoderoso lo guia y duna boso sabiduria pa eherce e bunita profesion di maestro cu hopi amor y dedicacion. Pabien na tur graduado y un feliz vakantie na tur e maestronan y muchanan di Aruba!

A bira un tradicion di cada 4 aña di IPA pa organisa un foro politico prome cu eleccion di Parlamento. E meta di e foro aki ta pa duna cada representante di partido e oportunidad pa comparti su vision encuanto desaroyo di enseñansa den siglo 21. Alabes pa e comunidad di IPA y tur partners den enseñansa haya sa kico ta e plannan cu e partido tin pa loke ta trata enseñansa en general.

A opta pa uza durante e foro politico diferente forma didactico cu e docentenan ta uza na IPA. Di e manera aki e representantenan por experiencia e uzo di forma di traha activo cu IPA ta promove bou di su studiantenan. E foro a inicia cu un icebreaker na unda pa medio di e programa Kahoot e representantenan por a participa na un quiz basa riba preparacion cu nan a haci riba tereno di enseñansa. Di e forma aki e representantenan por a relaha y aclamatisa un poco prome cu e foro cuminsa.

E foro mes tabata consisti di tres tanda. Durante e prome tanda a haci diferente pregunta relaciona cu enseñansa entre otro: enseñansa den siglo 21, Scol Arubano Multilingual, PEN2030, Infrastructura y Movecion y Salud. E preguntanan haci, ta preguntanan acumula di IPA su propio studiante- y docentenan. Siñamento den siglo 21 ta rekeri cierto habilidadnan. Algun di e habilidadnan aki ta, entre otro: pensamento critico, creatividad, comunicacion y colaboracion. Nos muchanan tin cu siña traha hunto, comunica y colabora pa bin cu solucion creativo. Esaki tambe ta esencial pa bon gobernacion. Pa e motibo aki den tanda dos a scoge pa e forma didactico siña di forma colaborativo (samenwerkend leren). A agrupa e representantenan a base di tira lot. Esnan cu tin e mesun number a forma un coalicion. E coalicionnan cu a keda forma ta: grupo 1 RAIZ, MAS, PPA y PP., grupo 2 ACCION21, UPP, MEP y AVP., grupo 3 CURPA, RED, POR Y HTC. Cada grupo a haya un casus cu nan mester a discuti hunto y presenta despues na e publico.

E ultimo tanda tabata encera turno liber unda e representantenan por a comparti of convence publico pakico mester vota pa nan of pa nan partido. A finalisa e foro cu evaluacion di proceso unda e representantenan mester a expresa den un palabra con nan a experiencia e foro.

Naturalmente e publico cu a sigui e foro politico di cerca, por a yena un encuesta via e programa Mentimeter, caminda por evalua e representantenan riba diferente tereno entre otro: presentacion, preparacion y contenido. Por ultimo e publico por a scoge pa kende nan lo a vota a base di e presentacion di representante. E partidonan cu a resalta tabata MEP, MAS y RAIZ.

Un palabra di gratitud ta bay na tur e representantenan pa acepta e invitacion di IPA y participa activamente na e foro: Flora Petronilia (Accion 21), Natalie Geerman (PPA), Solangel Dinmohamed-Laclé (MAS), Ivan Yarzagaray (UPP), Sue-Ann Ras (MEP), Gilbert Webb (HTC), Anchelino Vrolijk (POR), Ryçond Santos do Nascimento (AVP), Gisele-Mireille Sint Jago (PP), Max Robert (CURPA), Ivan Croes (RAIZ), Armando Lampe (RED). Tambe IPA ta gradici e team di studiante y personal cu a organisa e foro politico. Masha danki di curason.