Den cuadro di finalisacion di e estudio pa bira maestro di scol e studiantenan di Instituto Pedagogico Arubano (IPA) di ultimo aña mester haci un investigacion y un proyecto social. E investigacion ta pa nan tesina di finalisacion di estudio (afstudeerproject) y e proyecto social ta na bienestar di un instancia, grupo of comunidad en general. Di e delaster aki nan mester haci un presentacion cu ta forma parti di e examen final. E presentacion lo ta den forma di un exposicion caminda nan ta presenta nan proyecto na e docentenan di IPA, e instancianan y na publico en general. E proyecto social ta hopi importante den cuadro di e desaroyo como docente y “agente social”, esta como persona clave den nos comunidad Arubano cu ta participa y contribui activamente den e desaroyo social y cultural di nos pais. E aña aki nos studiantenan ta presenta varios proyecto y topico interesante cu nan a elabora y traha riba nan conhuntamente cu e instancianan social na Aruba. Algun di e instancianan aki ta entre otro SMAC, Stichting Casa Cuna Progreso, Reach your goal foundation, Imeldahof, FPNC, Donkey Sanctuary Aruba y Stichting Rancho.

Aki nos ta duna un bista di e studiantenan y e topico di nan proyecto social cu nan lo expone:

E exposicion di e proyectonan social ta habri pa publico diaranson dia 9 di mei di 2or di atardi pa 6or di anochi den Sala Madonna Stephens na IPA. Tur educador y interesado ta keda cordialmente invita pa asisti na e exposicion interesante aki di nos studiantenan.

Studiantenan di Movecion y Salud di IPA cu pasantia internacional Durante e di tres aña di e estudio na Instituto Pedagogico Arubano (IPA) e studiantenan ta participa na e programa Perspectiva Mundial. E programa aki ta brinda e studiantenan e oportunidad pa profundisa nan mes den e aspectonan di e profesion di maestro den exterior.

E tema di e programa Perspectiva Mundial pa e aña academico aki ta: Sustainable Lifestyle; un condicion pa un estilo di bida sano y balansa pa nos mes y pa comunidad di Aruba. E programa aki ta pone mas enfasis riba e integracion di e concepto Desaroyo Sostenibel den dunamento di les na scol. E ta prepara studiante pa aporta na un futuro duradero y ta ofrece nan conocemento y habilidad. Alabes e ta forma nan manera di pensa uzando diferente tema den klas.

E studiantenan di e estudio di Movecion y Salud a scoge e aña aki pa un pasantia na Merca (Boston) y Spaña (Barcelona). E studiantenan lo profundisa nan mes den e aspectonan di educacion fisico, salubridad y deporte, den e pais cu nan ta bishita. Como preparacion pa e pasantia internacional e studiantenan a participa na diferente tayer, charla y excursion. Un ehempel ta Scol Saludabel cu a duna un tayer tocante e concepto di scol saludabel y den ki forma e studiantenan por aplica e concepto den nan scol di practica. Otro ehempel ta un tayer di IBISA. Durante e tayer aki a elabora riba e topico deporte escolar y deporte recreativo na Aruba. E studiantenan mester a busca forma y idea cu por uza pa mehora deporte escolar den futuro. Tambe e studiantenan a haya les di comunicacion den movecion y salud di manera cu nan por traha riba teambuilding y teamwork. Alabes nan a haya charla di PR marketing di actividad fisico pa Aruba.

E team di Movecion y Salud hunto cu Springfield College, Shape America, Universidad di Barcelona y YMCA Barcelona a logra cera acuerdo pa prepara un programa intensivo dirigi riba promocion di actividad fisico, trabao comunitario, salubridad y deporte. Durante nan pasantia e studiantenan lo haci nan investigacion a base di e tareanan ricibi for di IPA, excursion na diferente instituto y tayer na e universidadnan y haci entrevista cu persona renombra den ramo di educacion fisico, deporte y salubridad. Naturalmente e studiantenan lo bishita diferente scol p’asina nan mira con ta duna forma na educacion fisico, deporte y salubridad den enseñansa. Despues di nan regreso, e studiantenan lo haci investigacion na nan scol di practica aki na Aruba. Nan lo haci comparacion entre e dos paisnan y presenta e resultadonan den luna di april na henter e comunidad di Aruba, specialmente na esnan den enseñansa.

Un palabra di gradicimento ta bay na tur persona of instancia cu tambe a contribui di un manera of otro na e biahe di e studiantenan. Alabes IPA ta gradici e famia di e studiantenan pa nan sosten. IPA ta desea e studiantenan hopi exito den Perspectiva Mundial y despues den nan pasantia.