Recientemente Wayne State College (WSC) a celebra e logro di e studiantenan cu a obtene nan Master of Science in Education. E dia di graduacion tabata un dia special pa Aruba ya cu e prome grupo di WSC Community of Learning na Aruba (Aruba 01) a gradua. Un total di 11 profesional den campo di educacion a ricibi e titulo di Master of Science in Education (MSE): Curriculum & Instruction - Instructional Leadership. E graduadonan ta: Swinda de Cuba - Arendsz, Emilaine Giel, Tamara Hamlet, Regina de Kort, Nadia Maduro, Zuleika Fernandes Perna - Silva, Franklin Richardson, Charmaine Tromp - Maduro, Ruzischka Tromp, Sherissa Tsu y Rachel Werleman.
Pa e graduacion 5 di e graduadonan a biaha pa Nebraska, acompaña pa nan sernan keri, pa asina tuma parti na e Commencement Ceremony na Wayne State College. Drs. sra. Marilyn Richardson, director general di IPA, y sra. Roke Hoen MSc., un di e dos facilitadornan di e estudio, tambe a biaha pa Nebraska pa asisti na e ceremonia oficial como representante di estudio di WSC- Master of Science in Education na Aruba.
Presidente di WSC Dr. Marysz Rames a dedica atencion special na e graduadonan di Aruba. El a splica cu desde 2020 WSC tin un ‘Community of Learning’ na Aruba y cu WSC tin un colaboracion unico y estrecho cu IPA y Minister di Enseñansa y Deporte di Aruba.
E graduadonan a percura pa e bandera di Aruba tabata presente na Wayne State College.
Directorado di IPA, y e dos facilitadornan Darrelyn Maduro MSc. y Roke Hoen MSc., ta orguyoso di e grupo Aruba 01 y ta felicita y desea e graduadonan hopi exito. Tambe nan ta sigur cu e graduadonan lo haci un diferencia positivo den bida di nos muchanan/ hobenan y den educacion di Aruba en general.