Vragen? +297-524 3100 info@ipaaruba.com

IPA ta invita comunidad di Aruba pa su Dia Publico dia 14 di november

Construi bo canva, esaki ta nomber di Instituto Pedagogico Arubano (IPA) su Dia Publico 2022. Cu e tema aki nos kier enfoca riba e echo cu mesun cos cu bo ta duna bida y color na un canva, abo ta e unico persona encarga pa construi bo futuro door di tuma decision y carga bo responsabilidad. Como futuro maestro bo ta hunga un rol importante den e creacion di futuro di cada mucha.

Dialuna, dia 14 di november 2022, IPA ta tene su Dia Publico (Open dag) anual. Durante e actividad nos lo duna informacion di e 3 estudionan cu IPA lo ofrece durante aña academico 2022-2023, cual ta e Estudio pa Maestro di Enseñansa Primario, Curso di Certificacion Pedagogico Didactico (PDG) y Master of Science in Education (MSE): Curriculum & Instruction - Instructional Leadership - Format Community of Learning. Cada estudio tin su grupo meta y orario specifico pa por haya informacion. E Dia Publico ta tuma luga na IPA (Isaac Wagemakerstraat 11, San Nicolas).

Estudio pa Maestro di Enseñansa Primario

E estudio pa maestro di Enseñansa Primario ta forma maestro cu ta cualifica pa duna les na mucha di scol preparatorio y/ of scol basico. Durante e Dia Publico lo tin 3 sesion, den cua e bishitante lo ricibi informacion di varios area di formacion. Cada sesion lo termina cu informacion general. Di e forma aki bo ta haya un bista completo di kico e estudio ta encera y bo ta experiencia e ambiente estudiantil. E orarionan di tour ta: 6:30 pm, 7:15 pm y 8:00 pm. E estudio aki ta specialmente pa studiante cu tin diploma di HAVO, VWO y MBO nivel 4 of cu ta den examenklas.

PDG

PDG ta un curso parcial pa e profesionalnan cu kier continua nan carera den ramo di enseñansa. Pa medio di e curso di PDG e profesionalnan por desaroya competencia pedagogico y didactico. E orarionan cu bo lo por ricibi informacion general di e estudio aki ta 6:30 pm y 7:30 pm.

MSE

MSE ta un estudio riba nivel master specialmente pa maestro cu ta traha den enseñansa regular of un profesional den campo di enseñansa cu ta desea di specialisa su mes den educacion, specificamente desaroyo di curiculo of instruccion y didactica. E orarionan cu bo lo por ricibi informacion general di e estudio aki ta 6:30 pm y 7:30 pm.

IPA ta invita henter e comunidad di Aruba, specialmente tur e personanan cu ta interesa pa haci un estudio na IPA pa asisti e Dia Publico. Haci uzo di e oportunidad pa haya tur informacion personalmente y haci pregunta.

Durante e dianan aki nos lo pone diferente publicacion di studiante y maestro riba e pagina di facebook ‘Instituto Pedagogico Arubano’. Nos ta invita bo pa like e pagina y sigui IPA di cerca. Pa mas informacion, por bishita nos website www.ipaaruba.com of pagina di facebook y si ainda bo tin cualkier pregunta, por tuma contacto cu Studenten Services na 5243100.

Construi bo canva

Bo futuro, bo decision, bo responsabilidad.