Recientemente, Instituto Pedagogico Arubano (IPA), a tene su ceremonia di graduacion di aña academico 2022-2023. Cu orguyo, IPA ta anuncia cu awor nos enseñansa ta conta cu un grupo di 30 maestro cu lo reenforsa nos educacion na Aruba. E graduadonan tin diferente specialisacion, entre otro, Bachelor Nederlands als Vreemde Taal, Movecion y Salud, Pedagogisch Didactisch Getuigschrift y Estudio pa maestro di Enseñansa Primario.

E studiantenan cu a gradua den aña academico 2022-2023 ta: Bachelor Nederlands als Vreemde Taal: Tarah Ajodhia, Marliènne Lyder, Mylainah Maduro, Nadine Murray, Laurence Wilming. Movecion y Salud: Lilianne Saladine, Dillon Willems. Pedagogisch Didactisch Getuigschrift: Xzmyra Croes, Kevin Hodge, Saskia Loopstok. Estudio pa maestro di Enseñansa Primario: Criselma Adams, Jouenelin Blanco, Lugena Boekhoudt, Karen Cuaran Castillo, Sandhya Dyal, Shanella Hijmering, Cislaine Jansen, Jowen Maduro, Fianardys Matos Gonzales, Giomary Rafael, Gabriel Vrolijk, Jesseline Berg, Kayleigh Esguerra, Whitney Gutierrez, Ligia Lugo Mendoza, Dariëne Rodgers, Beverly Rojer, Norine Werleman. Bachelor Papiamento Trayecto Cortico: Gwendoline Vrolijk. Bachelor Papiamento Estudio Inicial: Aimee Rosina.

Alabes e graduadonan di e colaboracion entre Wayne State College y IPA tambe tabata tey presente na IPA su graduacion. Un total di 11 profesional den campo di educacion a forma e prome grupo di Aruba pa sigui e estudio Master of Science in Education (MSE): Curriculum & Instruction - Instructional Leadership di Wayne State College na Nebraska. Aunke cu nan no ta graduadonan oficial di IPA, IPA ta celebra e momento aki basa riba e colaboracion entre IPA y Wayne State College. E graduadonan ta: Swinda de Cuba - Arendsz, Emilaine Giel, Tamara Hamlet, Regina de Kort, Nadia Maduro, Zuleika Fernandes Perna - Silva, Franklin Richardson, Charmaine Tromp - Maduro, Ruzischka Tromp, Sherissa Tsu y Rachel Werleman.

Durante e graduacion, directora general drs. Marilyn Richardson a dirigi palabra na e publico presente, specialmente na e graduadonan. El a inicia su discurso bisando e graduadonan cu nan a logra di bira maestro di scol of a sa di amplia nan conocemento, abilidad y competencia como maestro existente por medio di tremendo dedicacion y perseverancia.

Hunto diseñando futuro tabata e tema di IPA su graduacion. E mensahe cu drs. Richardson a comparti cu e graduadonan ta cu cada un di nan tin poder enorme pa por influencia nos comunidad. Ta duel e di wak con mundialmente y na Aruba no ta duna e profesion di maestro e balor y posicion cu e merece. Como educador nos ta diseñador y creador di futuro. Drs. Richardson a elabora riba e importancia di e palabra hunto y e rol clave cu cada educador tin: “Pa nos por resolve e retonan cu educacion y educadornan ta enfrentanto nos mester di henter e cadena den enseñana pa traha riba solucion. For di Minister di Enseñansa, pa Departamento di Enseñansa, pa directivanan di scol, instituto di formacion di maestro y e maestronan mes.” Segun drs. Richardson, cada un riba su mes tin cu traha riba mehoracion di e posicion, e imagen di maestro. E profesion aki ta demasiado importante pa nos futuro pa no tin un posicion clave den nos comunidad. Hunto nos mester percura cu e pasion pa kier ta un maestro ta rebiba y keda stabil bao di e generacionan nos dilanti.

PEN2030 ta para pa, entre otro, responsabilidad comun pa un enseñansa di calidad, ‘empowerment’, respet, mentalidad habri y curiosidad pa siña. Drs. Richardson a splica cu e graduadonan tin e base aki den nan formacion como maestro, pero awo ta keda na cada un di nan pa keda nutri e balornan aki p’asina carga e vision di PEN2030.

Drs. Richardson a termina su discurso bisando e graduadonan cu awe nan ta celebra un logro, pero corda cu no tin limite na cuanto nan mes por desaroya y sigui siña pa ta un miho persona, un miho profesional, un ‘lifelong learner’ p’asina hunto crea un miho mundo pa nos tur.

E anochi aki tabata uno hopi ameno, caminda e comunidad di IPA conhuntamente cu famia y invitado di e graduadonan a celebra nan logro den Arikok Saloon di Hyatt Place. E anochi tabata acompaña cu e tononan musical di Suona.

IPA ta desea tur colega nobo un carera fructifero y exitoso. Nos ta spera cu Todopoderoso lo guia y duna boso sabiduria pa eherce e bunita profesion di maestro cu hopi amor y dedicacion. Pabien na tur graduado y un feliz vakantie na tur e maestronan y muchanan di Aruba!

Instituto Pedagogico Arubano (IPA) ta invita henter e comunidad di Aruba pa asisti diabierna awo, dia 16 di juni 2023, na e presentacion di e proyectonan di finalisacion di estudio di e studiantenan di aña cuater. Den cuadro di finalisacion di e estudio pa maestro e studiantenan di ultimo fase mester haci un investigacion tocante un tema cu tin di haber cu innovacion y desaroyo den enseñansa. Banda di e investigacion e studiante mester a desaroya material educativo relaciona cu e tema cu el a profundisa su mes den dje. E investigacion y material desaroya ta pa nan tesina di finalisacion di estudio. Di e investigacion y material aki e studiante lo duna un presentacion cu ta forma parti di examen final. Den e presentacion e studiantenan ta presenta nan proyecto final na e docentenan di IPA, na famia y tambe na publico en general.

IPA ta invita tur interesado pa bin wak e presentacionnan unda nos studiantenan lo elabora riba e investigacion cu nan a realisa den practica. E presentacionnan lo tuma luga na IPA (Isaac Wagemakerstraat 11, San Nicolas) y ta di 1:30 di atardi pa 6:00 di atardi.

E temanan di investigacion cu e studiantenan lo presenta ta:

Orario: 13:30 – 14:15

• Cislaine Jansen: Dames en heren, wij gaan digitaal beheren! Een onderzoek naar de digitalisering van traditionele methode van aardrijkskunde.

• Jouenelin Blanco: Social Emotional Learning met coöperatieve werkvormen? Hoe zou dat zijn!

• Nadine Murray: Actieve participatie tijdens de Nederlandse leesvaardigheidslessen door middel van translanguaging en activerende werkvormen.

• Mylainah Maduro: "De betrokkenheid van leerlingen vergroten en gedragsproblemen verminderen: het belang van een positief pedagogisch klimaat in de klas."

• Dillon Willems: Een praktijkgericht onderzoek naar de huidige werksituatie van de "Movecion y Salud" leerkrachten voor het vak bewegingsonderwijs op de basisscholen.

Orario: 14:30 – 15:15

• Kayleigh Esguerra: Digitale Geletterdheid in het Kleuteronderwijs. Het toepassen van digitale geletterdheid in een kleuterklas.

• Karen Cuaran Castillo: Op zoek naar effectievere planning om de beheersingniveaus van de leerlingen te verbeteren.

• Beverly Rojer: Vakintegratie, gebruik je lestijd nuttig. Voorwaarden om in aanmerking te komen voor een beoordeling. Een praktijkonderzoek over het integreren van de vakgebieden godsdienst en drama/muziek ter verhoging van de betrokkenheid van de leerlingen bij het vakgebied godsdienst.

• Jesseline Berg: De positieve impact van sociaal emotioneel leren op het welzijn van leerlingen van klas 1.

• Laurence Wilming: Gemotiveerde leerlingen tijdens de Nederlandse lessen. Motivatie en actieve deelname verhogen in de eerste klas mavo.

Orario: 15:30 – 16:15

• Marlienne Lyder: Laten we schrijven! Een humanistische benadering van het leren van Nederlands, rekening houdend met onze cultuur.

• Dariene Rodgers: Lezen, een wereld vol magie. Technisch lezen ondersteunen in klas 1.

• Shanella Hijmering: Positief Gedrag en Veilige Leerklimaat in de Klas

• Whitney Gutierrez: Sociaal Emotioneel Leren. (SEL) Om sociaal problematisch gedrag bij jongetjes in de klas te verminderen.

• Norine Werleman: Stimuleren om ritmische bouwstenen te gebruiken in de klas zodat de kleuters hun cognitieve vaardigheden optimaal kunnen ontwikkelen

Orario: 16:30 – 17:15

• Tarah Ajodhia: Thematisch werken: De sleutel tot verhoogde leeropbrengst en motivatie.

• Criselma Adams: Parental Involvement and its Benefits on Student Achievement

Pa 5:30 tur studiante lo ricibi e resultado di nan presentacion.

Pond Island ________Diadomingo, 25 di juni, e cuater institutonan principal di enseñansa superior y investigacion den e parti Caribense di Reino a firma dos Memorandum of Understanding pa colaboracion mas fuerte y intercambio entre facultad pa loke ta trata personal y studiante.

Representante di University of St. Martin (USM), University of Curaçao (UoC), University of Aruba (UA) y Instituto Pedagogico Arubano (IPA) a topa na campus di USM na Pond Island durante fin di siman pa discuti area di colaboracion, programa di intercambio y mobilidad den Reino Hulandes pa sostene exito di studiante y mas desaroyo di enseñansa superior den region. Un MOU a afirma e compromiso cu a haci na 2014 entre e institutonan di Caribe (UNICARIB) pa coopera den desaroyo di curiculo, comparti recurso y investigacion. E di dos documento cu a firma ta segura partership den programa di intercambio di studiante, reconocemento di credito y intercambio profesional y academico entre miembro di facultad y personal den cuadro di Strategic Education Alliance (SEA).

Ya a aloca fondo pa intercambio di studiante durante e ultimo Vierlandenoverleg (4LO) na januari di aña aki, ora cu minister di educacion di Hulanda, Curaçao, Aruba y Sint Maarten a compromete pa traha cu e universidadnan regional pa trece calidad di enseñansa den Caribe. Entre e acuerdonan tabata coordinacion di un aña fundeshi pre-academico cu ta enfoca riba preparacion di studiante pa enseñansa superior den region of na Hulanda. Tambe durante e reunion, tur cuater instituto a compromete pa instala Caribbean Higher Education Council of the Kingdom of the Netherlands (CHECK). E Conseho di Enseñansa Superior di Caribe di Reino Hulandes lo supervisa proyecto, dialogo tocante acreditacion y seguridad di calidad, sincronisacion di investigacion cientifico y basa riba practica y programa academico, y duna conseho na minister tocante maneho relaciona. CHECK lo traha hopi di acerca cu SEA. SEA a ser instala durante un conferencia di trabou na Aruba na september di 2022, unda representante di instituto regional di enseñansa terciario y superior a topa cu tur cuatro ministerio y entidad publico di Saba, Sint Eustatius y Bonaire. Siguiendo experiencia di programa di intercambio na nivel Europeo manera Erasmus+, a crea SEA+ pa facilita intercambio den Reino. Intercambio di studiante por inicia den aña academico 2023-2024 y studiante por pasa te cu un semester den exterior. Na cada instituto, un departamento di asunto internacional lo coordina e programanan di intercambio. Beca ta ofrece un compensacion di gasto di biahe y estadia. Na e reunion tene na USM diadomingo tabata presente Director di IPA drs. Marilyn Richardson, Rector di UA Prof. dr. Viola Heutger y Presidente di USM Prof. dr. Antonio Carmona Baez. Representando University of Curaçao tabata Prof. dr. Elisabeth Echteld. E ekipo tabata compaña pa Julisca van Rossum di Ministerio di Enseñansa, Cultura y Ciencia di Caribe Hulandes, y Wladimir Kleinmoedig di Ministerio di Enseñansa, Ciensia, Cultura y Deporte di Curaçao. E siguiente encuentro di e Conseho nobo funda ta planea pa tuma luga na september.

E curso di PDG di IPA ta ‘revamped, amped & restamped’!

Asina mes! PDG-10 tin un bachi nobo! E curso di Certificacion Pedagogico Didactico (PDG-10) ta un curso parcial pa e profesionalnan cu kier ta competente den e profesion di docente of educador.

Abo of un conocir di bo ta cla pa un cambio di carera? Bo semper tawatin aspiracion pa aporta na enseñansa? Bo tin afinidad y interes pa traha y yuda den e desaroyo di mucha y hoben? E ora ta PDG-10 di IPA ta na unda bo mester ta!

PDG-10 ta e di 10 grupo cu ta bay haci e curso aki y awo mas cu nunca mester probecha paso ful e programa ta renoba! Un team relativamente hoben, ambicioso, creativo y cu hopi experencia den enseñansa a bini hunto pa renoba e programa di PDG-10.

• Un duracion total di 24 luna, pero cu oportunidad personalisa pa caba mas trempan den 18 luna!

• ‘Deep learning’ cu hopi atencion y tempo pa practica y ta hands-on bezig.

• Un team dinamico cu mas prioridad pa guia y desaroyo profesional y personal di cada participante.

• Maestro cu ta traha no-certifica, esta ‘onbevoegd’ den enseñansa avansa e.o. EPI y MAVO.

• Profesional di otro sector e.o. empresa of instancia cu no ta enseñansa, cu tin interes y motivacion pa sa mas di e profesion di educacion, y cu kier traha riba nan conocemento y habilidad pedagogico didactico. Pa e grupo di profesional aki PDG ta un rekisito pa drenta sector di enseñansa. (minimale diploma toelating ta HBO).

Bo ta cumpli cu e rekisitonan menciona y ta desea di ricibi e Certificacion Pedagogico Didactico cu IPA ta ofrece? Bishita www.ipaaruba.com, bay na aanmelden y scoge pa PDG y sigui e instruccion. Ora ta bay pa yena e formulario digital, mester tin PDF di diploma(nan) y lista(nan) di cifra ‘gewaarmerkt’ pa agrega esakinan na e formulario. E ultimo dia pa inscribi ta 9 di juni 2023. Despues di e fecha aki no por inscribi mas pa aña academico 2023-2024.

Pa mas informacion por bishita nos website www.ipaaruba.com of pagina di Facebook ‘Instituto Pedagogico Arubano’ y si ainda tin cualkier pregunta, por tuma contacto cu Studenten Services na 5243100.