Bo kier aporta na formacion di nos muchanan? Bo ta un persona cu por carga responsabilidad y traha independientemente of den ekipo? Bo ta curioso y creativo? Si e contestanan ta si, e ora e estudio pa Maestro di Enseñansa Primario, cu IPA ta ofrece, ta e estudio ideal pa bo. Estudio pa Maestro di Enseñansa Primario ta forma maestro cu ta cualifica pa duna les na mucha di scol preparatorio y/ of scol basico: un maestro cu ta funciona competentemente den klas, na scol y den comunidad.

Tur informacion di estudio pa Maestro di Enseñansa Primario ta riba website di IPA. Subi www.ipaaruba.com y click riba opleidingen sigui pa Leraar Primair Onderwijs. Aki lo bo haya informacion di entre otro contenido di e estudio, kico bo por haci despues di e estudio, gasto y procedura di inscripcion.

Durante open dag di IPA, dia 4 di november 2023, lo ofrece dos sesion di informacion general di estudio pa Maestro di Enseñansa Primario cu bo lo por atende. E orario di sesion 1 ta 10:15 am y di sesion 2 ta 11:00 am.

Bo ta sinti bo yama pa haci e estudio aki y ta desea di inscribi? Inscripcion ta tuma luga online. Bishita www.ipaaruba.com, bay na aanmelden y scoge pa beroepstest Primair Onderwijs y sigui e instruccion. Pa por inscribi mester cumpli cu e pago di AWG 80,- y pone como anexo un copia di e comprobante di pago den e formulario digital di inscripcion. Tene na cuenta cu e comprobante mester tin bo nomber riba dje, p’asina nos sa na ken e pago ta pertenece. Na final bo lo ricibi confirmacion di bo inscripcion. Solamente studiante den examenklas of graduado di havo, vwo of mbo nivel 4 por inscribi pa e estudio pa maestro di Enseñansa Primario.

Pa keda altanto di e ultimo desaroyonan di IPA bishita www.ipaaruba.com y sigui nos riba e pagina di facebook Instituto Pedagogico Arubano.

“Talk IPA to me!” Esaki ta e tema di Instituto Pedagogico Arubano (IPA) su open dag 2023 cu lo tuma luga diasabra 4 di november di 10:00 am - 12:30 pm na IPA (Isaac Wagemakerstraat 11, San Nicolas). Nos kier pa abo, cu tin e pasion pa bira maestro, bin combersa cu nos y si bo ta explora opcion di estudio, join nos y laga nos inspira bo. Durante open dag nos lo duna informacion di e estudio pa Maestro di Enseñansa Primario, Bachelor Nederlands als Vreemde Taal, Curso di Certificacion Pedagogico Didactico (PDG) y asina yama 21+ Toets.

Tuma nota cu cada estudio tin su grupo meta y orario specifico pa por haya informacion:

E estudio pa Maestro di Enseñansa Primario ta forma maestro cu ta cualifica pa duna les na mucha di scol preparatorio y/ of scol basico. Durante open dag lo tin 2 sesion cu e bishitante lo por atende pa ricibi informacion di e estudio. E orario di sesion 1 ta 10:15 am y di sesion 2 ta 11:00 am.

Bachelor Nederlands als Vreemde Taal ta un estudio pa bira docente Bachelor di Hulandes cu ta cualifica pa duna les na alumno di EPB, EPI, mavo y e prome tres añanan di havo y vwo. E orario di sesion 1 ta 10:30 am y di sesion 2 ta 11:30 am.

Pa inscribi pa e dos estudionan ya menciona mester tin diploma di havo, vwo of mbo nivel 4 (of den examenklas di un di esakinan).

Tur persona cu tin desde 1 di september 2025 minimo 21 aña y cu kier haci un estudio na IPA pero no tin diploma di sea havo, vwo of mbo nivel 4, ta bin na remarca pa haci e asina yama 21+ Toets. E 21+ Toets ta midi si bo tin e nivel di havo cu ta necesario pa por studia na IPA. Si bo logra pasa e 21+ Toets cu exito bo por inscribi pa un estudio inicial cu IPA lo ofrece durante aña academico 2025-2026. Asina cu bo inscribi bo ta bin na remarca pa participa na e test di admision (beroepstest) y e programa preparatorio (voorprogramma) cu lo tuma luga durante aña academico 2024-2025. Si bo logra pasa e test di admision cu exito y completa e programa preparatorio bo por cuminsa cu bo estudio na augustus 2025. E orarionan cu bo lo por ricibi informacion general di 21+ Toets ta sea 10:30 am of 11:30 am.

PDG ta un curso parcial pa e profesionalnan cu kier continua nan carera den ramo di enseñansa. Pa medio di e curso di PDG e profesionalnan por desaroya competencia pedagogico y didactico. E orarionan cu bo lo por ricibi informacion general di e estudio aki ta sea 10:30 am of 11:30 am.

Nos studiantenan di aña 3 di estudio pa Maestro di Enseñansa Primario lo t’ey presente cu benta di pasaboca. Meta di esaki ta pa recauda fondo pa e pasantia internacional cu ta forma parti di e curiculo di nan estudio.

Lo tin actividad specialmente pa nos muchanan cu lo asisiti nos open dag. Di e forma aki tur adulto por asisti na e sesionnan di informacion sin mester preocupa pa e chikitin mirando cu e lo ta bon entretene.

IPA ta invita henter comunidad di Aruba, specialmente tur persona cu ta interesa pa haci un estudio na IPA pa asisti na nos open dag. Probecha di e oportunidad pa haya tur informacion personalmente y haci pregunta. Pa mas informacion, por bishita nos website www.ipaaruba.com of pagina di facebook Instituto Pedagogico Arubano y si ainda bo tin cualkier pregunta, por tuma contacto cu Studenten Services na 5243100

Bo no tin diploma y kier bira maestro? 21+ Toets por ta e solucion! Tur persona cu tin desde 1 di september 2025 minimo 21 aña y cu kier haci un estudio na IPA pero no tin diploma di sea havo, vwo of mbo nivel 4, ta bin na remarca pa haci e asina yama 21+ Toets. E 21+ Toets ta midi si bo tin e nivel di havo cu ta necesario pa por studia na IPA. Si bo logra pasa e 21+ Toets cu exito bo por inscribi pa un estudio inicial cu IPA lo ofrece durante aña academico 2025-2026. Asina cu bo inscribi bo ta bin na remarca pa participa na e test di admision (beroepstest) y e programa preparatorio (voorprogramma) cu lo tuma luga durante aña academico 2024-2025. Si bo logra pasa e test di admision cu exito y completa e programa preparatorio bo por cuminsa cu bo estudio na augustus 2025.

E 21+ Toets ta consisti di tres materia entre otro: Hulandes, Matematica y Hende y Comunidad. E 21+ Toets ta tuma luga diasabra 13, diamars 16 y diasabra 20 di april 2024.

Tur informacion di e 21+ Toets ta riba IPA su website. Bay na www.ipaaruba.com y click riba 21+Toets. Akinan lo bo haya informacion tocante e contenido di e 21+Toets, e preguntanan mas frecuente haci (Pag. 13 y 14 Toelichtingsdocument IPA 21+ toetsen voor het studiejaar 2025-2026) y e procedura di inscripcion.

Durante IPA su open dag, dia 4 di november, lo ofrece dos sesion di informacion general di 21+ Toets. E orarionan cu bo lo por ricibi informacion ta sea 10:30 am of 11:30 am. Banda di esaki lo tin anochi di informacion diaranson dia 29 di november 2023 di 7:00 pm - 8:30 pm y diaranson dia 10 di januari 2024 tambe di 7:00 pm - 8:30 pm. Ambos anochi di informacion lo tuma luga na IPA. Bo lo haya splicacion di kico e 21+ Toets ta encera. Alabes lo elabora riba contenido y trata ehempel di tarea di diferente materia cu ta forma parti di e 21+ Toets.

Tur persona cu ta interesa pa haci e 21+ Toets por inscribi via e website www.ipaaruba.com. Pa por inscribi mester cumpli cu e pago di AWG 80,- y pone como anexo un copia di e comprobante di pago den e formulario digital di inscripcion. Tene na cuenta cu e comprobante mester tin bo nomber riba dje, p’asina nos sa na ken e pago ta pertenece. Na final bo lo ricibi un confirmacion di bo inscripcion. E ultimo dia pa inscribi pa e 21+ Toets ta 12 di januari 2024. Despues di e fecha aki no tin posibilidad mas pa inscribi.

Pa keda altanto di e ultimo desaroyonan di IPA bishita www.ipaaruba.com y sigui nos riba e pagina di facebook Instituto Pedagogico Arubano.

Recientemente, Instituto Pedagogico Arubano (IPA), a tene su ceremonia di graduacion di aña academico 2022-2023. Cu orguyo, IPA ta anuncia cu awor nos enseñansa ta conta cu un grupo di 30 maestro cu lo reenforsa nos educacion na Aruba. E graduadonan tin diferente specialisacion, entre otro, Bachelor Nederlands als Vreemde Taal, Movecion y Salud, Pedagogisch Didactisch Getuigschrift y Estudio pa maestro di Enseñansa Primario.

E studiantenan cu a gradua den aña academico 2022-2023 ta: Bachelor Nederlands als Vreemde Taal: Tarah Ajodhia, Marliènne Lyder, Mylainah Maduro, Nadine Murray, Laurence Wilming. Movecion y Salud: Lilianne Saladine, Dillon Willems. Pedagogisch Didactisch Getuigschrift: Xzmyra Croes, Kevin Hodge, Saskia Loopstok. Estudio pa maestro di Enseñansa Primario: Criselma Adams, Jouenelin Blanco, Lugena Boekhoudt, Karen Cuaran Castillo, Sandhya Dyal, Shanella Hijmering, Cislaine Jansen, Jowen Maduro, Fianardys Matos Gonzales, Giomary Rafael, Gabriel Vrolijk, Jesseline Berg, Kayleigh Esguerra, Whitney Gutierrez, Ligia Lugo Mendoza, Dariëne Rodgers, Beverly Rojer, Norine Werleman. Bachelor Papiamento Trayecto Cortico: Gwendoline Vrolijk. Bachelor Papiamento Estudio Inicial: Aimee Rosina.

Alabes e graduadonan di e colaboracion entre Wayne State College y IPA tambe tabata tey presente na IPA su graduacion. Un total di 11 profesional den campo di educacion a forma e prome grupo di Aruba pa sigui e estudio Master of Science in Education (MSE): Curriculum & Instruction - Instructional Leadership di Wayne State College na Nebraska. Aunke cu nan no ta graduadonan oficial di IPA, IPA ta celebra e momento aki basa riba e colaboracion entre IPA y Wayne State College. E graduadonan ta: Swinda de Cuba - Arendsz, Emilaine Giel, Tamara Hamlet, Regina de Kort, Nadia Maduro, Zuleika Fernandes Perna - Silva, Franklin Richardson, Charmaine Tromp - Maduro, Ruzischka Tromp, Sherissa Tsu y Rachel Werleman.

Durante e graduacion, directora general drs. Marilyn Richardson a dirigi palabra na e publico presente, specialmente na e graduadonan. El a inicia su discurso bisando e graduadonan cu nan a logra di bira maestro di scol of a sa di amplia nan conocemento, abilidad y competencia como maestro existente por medio di tremendo dedicacion y perseverancia.

Hunto diseñando futuro tabata e tema di IPA su graduacion. E mensahe cu drs. Richardson a comparti cu e graduadonan ta cu cada un di nan tin poder enorme pa por influencia nos comunidad. Ta duel e di wak con mundialmente y na Aruba no ta duna e profesion di maestro e balor y posicion cu e merece. Como educador nos ta diseñador y creador di futuro. Drs. Richardson a elabora riba e importancia di e palabra hunto y e rol clave cu cada educador tin: “Pa nos por resolve e retonan cu educacion y educadornan ta enfrentanto nos mester di henter e cadena den enseñana pa traha riba solucion. For di Minister di Enseñansa, pa Departamento di Enseñansa, pa directivanan di scol, instituto di formacion di maestro y e maestronan mes.” Segun drs. Richardson, cada un riba su mes tin cu traha riba mehoracion di e posicion, e imagen di maestro. E profesion aki ta demasiado importante pa nos futuro pa no tin un posicion clave den nos comunidad. Hunto nos mester percura cu e pasion pa kier ta un maestro ta rebiba y keda stabil bao di e generacionan nos dilanti.

PEN2030 ta para pa, entre otro, responsabilidad comun pa un enseñansa di calidad, ‘empowerment’, respet, mentalidad habri y curiosidad pa siña. Drs. Richardson a splica cu e graduadonan tin e base aki den nan formacion como maestro, pero awo ta keda na cada un di nan pa keda nutri e balornan aki p’asina carga e vision di PEN2030.

Drs. Richardson a termina su discurso bisando e graduadonan cu awe nan ta celebra un logro, pero corda cu no tin limite na cuanto nan mes por desaroya y sigui siña pa ta un miho persona, un miho profesional, un ‘lifelong learner’ p’asina hunto crea un miho mundo pa nos tur.

E anochi aki tabata uno hopi ameno, caminda e comunidad di IPA conhuntamente cu famia y invitado di e graduadonan a celebra nan logro den Arikok Saloon di Hyatt Place. E anochi tabata acompaña cu e tononan musical di Suona.

IPA ta desea tur colega nobo un carera fructifero y exitoso. Nos ta spera cu Todopoderoso lo guia y duna boso sabiduria pa eherce e bunita profesion di maestro cu hopi amor y dedicacion. Pabien na tur graduado y un feliz vakantie na tur e maestronan y muchanan di Aruba!