.jpg)
IPA a honra su graduadonan di aña academico 2024-2025
Recientemente, Instituto Pedagogico Arubano (IPA), a tene su ceremonia di graduacion di aña academico 2024-2025 cu a hiba e tema Nabega pa un futuro briyante. Cu orguyo, IPA ta anuncia cu awor nos enseñansa ta conta cu un grupo di 13 maestro cu lo reenforsa nos educacion na Aruba. E graduadonan tin diferente specialisacion, entre otro, Maestro di Enseñansa Primario, Bachelor Nederlands als Vreemde Taal, Movecion y Salud y Pedagogisch Didactisch Getuigschrift.
E studiantenan cu a gradua den aña academico 2024-2025 ta: Estudio pa Maestro di Enseñansa Primario: Juraiska Croes, Giselle Evertsz, Rosaelina Maduro, Rigella Oduber, Sue-Donna Rombley, Nathaly Tobar. Bachelor Nederlands als Vreemde Taal, Initiële Opleiding: Giselle Geerman. Bachelor Nederlands als Vreemde Taal, Verkort Traject: Jéseña Croes, Gisela Trimon. Movecion y Salud: Josiah Tromp. Cursus Pedagogisch Didactisch Getuigschrift: Sydney Curiel, Gerar Khouri, Raymond Rasmijn.
Alabes e graduadonan di e colaboracion entre Wayne State College y IPA tambe tabata t’ey presente na IPA su graduacion. Un total di 11 profesional den campo di educacion a forma e di dos grupo di Aruba pa sigui e estudio Master of Science in Education (MSE): Curriculum & Instruction - Instructional Leadership di Wayne State College na Nebraska. Aunke cu nan no ta graduado oficial di IPA, IPA ta celebra e momento aki basa riba e colaboracion entre IPA y Wayne State College. E graduadonan ta: Zuleika Arendsz, Jaderick Croes, Xzmyra Croes, Gwenn Davelaar, Jessica Franken, Janirra Kock, Danielle Kole, Richelle Noel, Clarice Ras, Georgino Vrolijk y Milouschka Wernet.
Durante e graduacion, directora general drs. Marilyn Richardson a dirigi palabra na e publico presente, specialmente na e graduadonan. El a inicia su discurso bisando e graduadonan: “E echo cu boso ta aki nan awenochi ta un muestra di poder di perseverancia y dedicacion. E logro di ricibi un diploma ta nifica cu cada un di boso a sa di supera e retonan cu a presenta durante boso estudio. Cu confiansa boso a tuma e timon y a sa di nabega e oceano di formacion y a yega e destino di bira un maestro di scol of di a amplia boso conocemento, habilidad y competencia como maestro existente. Definitivamente ta un momento di tira bo anker pa celebra.”
Drs. Richardson a menciona cu rol di maestro ta mucho mas cu ofrece un base solido di conocemento y habilidad. Segun drs. Richardson maestro tin un responsabilidad grandi y un rol clave pa nutri desaroyo social emocional, resiliencia, empatia y importancia di colaboracion, p’asina percura cu nos muchanan ta haya un base firme, basa riba balor y un cultura di pas y union, pa nan siña aprecia diversidad, tin mente habri y creativo, siña maneha conflicto, confronta reto na un manera positivo y innovativo.
Alabes el a menciona cu IPA su fundeshi principal ta pa empodera lifelong learning y cu cada graduado ta IPA su embahador pa logra esaki den nos comunidad.
Na final di su discurso, e directora a expresa su orguyo:“No tin un profesion mas bunita cu esun di un maestro. Cu e profesion aki, boso no ta traha solamente riba boso mes futuro, pero tambe ta guia boso alumnonan, e pasaheronan di boso barco na destinacionan briyante.”
Como presentacion intermedio, tabatin un presentacion teatral prepara pa y dedica na nos graduadonan, titula Abordo e barco di IPA. E presentacion teatral a wordo skirbi y dirigi pa IPA su docente di Drama, Mr. Daylan Krozendijk, y e docentenan cu a actua den e presentacion ta: Dr. Gregory Richardson, Daylan Krozendijk BSc, Melendy Neuman MSc, drs. Noemy Croes y Maximo Wernet BPE. E presentacion ta trata di un capitan y su matrosnan cu ta prepara pa subi e barco di enseñansa, pa nabega pa un futuro briyante. Prome cu nan sali, e capitan ta motiva su tripulacion cu un speech inspirativo. Durante e biahe, nan ta topa obstaculo relaciona cu enseñansa. Pero ku fe y perseverancia, e capitan y su matrosnan ta logra yega na nan destinacion final cu exito.
E anochi aki tabata uno hopi ameno, caminda e comunidad di IPA conhuntamente cu famia y invitado di e graduadonan a celebra nan logro den Grand Ballroom di Aruba Marriott Resort & Stellaris Casino.
IPA ta desea tur colega nobo un carera fructifero y exitoso. Nos ta spera cu Todopoderoso lo guia y duna boso sabiduria pa eherce e bunita profesion di maestro cu hopi amor y dedicacion. Pabien na tur graduado y un feliz vakantie na tur e maestronan y muchanan di Aruba!
