Calidad di Bida di Hubentud Arubano

E Jeugdmonitor di continuacion postcovid ta un proyecto di estudio nacional bou di direccion di Minister di Enseñansa y Deporte y Minister di Husticia y Asunto Social, den kabinet Wever-Croes II. E proyecto ta basa riba algun di e cinco pilarnan di e 17 meta di desaroyo sostenibel di Nacion Uni (SDG3 & 4), cu e meta pa mapea y mehora calidad di bida y bienestar di su generacion futuro na Aruba.

Na november 2020, Jeugdmonitor piloto a wordo entrega na e minister di Enseñansa di es tiempo. Dato a wordo colecciona atraves di encuesta cu hubentud y entrevista, realisa prome di COVID-19, cu profesional di enseñansa di 11 scol piloto. Scol ta considera como e institucion central unda experiencia y ambiente di bida di mucha ta tuma lugar. E desafionan social ta contextualiza uzando e modelo di analisis di dato di Bronfenbrenner.

E estudio di continuacion aki tin como meta pa duna un bista completo y mas claridad tocante calidad di bida di hubentud di Aruba entre edad di 10 pa 14 aña durante y despues di pandemia. E ekipo aki ta multidisciplinario, multicultural y multi-etnico y ta conecta na Vrije Universiteit di Amsterdam (VU)/NSCR y Instituto Pedagogico Arubano (IPA). E meta ta pa implementa e resultadonan pa sigura y realisa un plan di maneho evidence-based sostenibel pa curso di bida saludabel y sigur pa hubentud.

E proyecto ta inicia y sosteni pa dr. Paula Kibbelaar, dr. Anne-Marie Slotboom, Prof. dr. Catrien Bijleveld, y Prof. dr. Jan Hendriks di VU/NSCR na Amsterdam. Adicionalmente, e team ta inclui profesional di IPA: drs. Janneke Dapper, drs. Gregory Goedgedrag, drs.ing. Rainier Kock, Sr. Marvin Odor, y Señora Marlene de Cuba. E team aki ta traha conhuntamente pa 6 aña pa desaroya un monitor responsabel y continuo na Aruba. E monitor actual ta resultado di colaboracion entre e dos organisacionnan.