Instituto Pedagogico Arubano (IPA) ta brinda e posibilidad pa haci e test di CNaVT Social Formal (B1), Competente Educativo (B2) y Profesional Educativo (C1). Esaki ta destina pa e studiantenan cu ta desea di haci e test aki na Aruba prome cu nan biaha pa Hulanda of Belgica pa sigui studia. Tin diferente estudio den enseñansa superior na Hulanda y Belgica cu ta exigi cu e studiante ta domina cierto nivel di Hulandes.

Awor por medio di IPA ta posibel pa haci e test aki na Aruba y ricibi e resultado prome cu biaha pa Hulanda of Belgica pa sigui studia.

Un Certificado di Hulandes como un Idioma Stranhero (CNaVT) ta brinda oportunidad pa, entre otro, estudio y desaroyo profesional. Esnan cu tin un certificado por haya dispensacion parcial pa e examen di integracion na Hulanda y Belgica. Algun certificado ta duna entrada na un estudio universitario na Hulandes of por habri porta pa trabao den enseñansa of pa reconecemento como traductor of interprete huramenta.

Proyecto CNaVT di Taalunie ta ofrece cinco examen pa esnan cu ta siña Hulandes como idioma stranhero y kier haya un certificado reconoci tocante nan nivel di idioma. E examennan ta midi funcionamento linguistico riba cuater nivel diferente segun Marco Referencial Europeo (ERK), di A2 te cu C1. Cada examen ta ubica den un area specifico (social, educativo of profesional) y tin obhetivo apart.

• Social Informal (INFO) - A2: Pa esnan cu kier comunica den situacion informal, di tur dia.

• Social Formal (FORM) - B1: Pa esnan cu kier funciona den contexto mas formal den comunidad Hulandes of Vlaams.

• Comercial Profesional (PROF) - B2: Pa esnan cu kier traha na pia di trabou, specialmente den sector di cuido di salud of profesion administrativo.

• Competente (pa cuminsa) Educativo (STRT) - B2: Pa esnan cu kier cuminsa un estudio na un scol superior of universidad Vlaams of Hulandes.

• Profesional Educativo (EDUP) - C1: Pa esnan cu kier traha den enseñansa of un ambiente di negoshi, unda rekisito ta un nivel avansa di Hulandes.

• Social Formal (FORM) - B1

• Competente (pa cuminsa) Educativo (STRT) - B2

• Profesional Educativo (EDUP) - C1

Pa inscribi pa un examen click riba e siguiente boton: inscribi awor

Tene na cuenta cu e ultimo dia pa inscribi ta diahuebs dia 19 di maart. Despues di e fecha aki no por inscribi mas pa participa na e ronda di mei. E examennan lo tuma luga entre 4 y 8 di mei 2026 y lo tuma luga riba 2 parti di dia.

Pa mas informacion, bishita: https://cnavt.org/

Diasabra dia 21 di februari, Instituto Pedagogico Arubano (IPA) ta tene su open dag 2026. Esaki ta di 5:00 pm – 8:00 pm y ta tuma luga na IPA (Isaac Wagemakerstraat 11, San Nicolas).

Pa e dia aki IPA a prepara un programa basta amplio y varia. Lo tin entre otro informacion general di:

• e estudio pa Maestro di Enseñansa Primario;

• e curso di Certificacion Pedagogico Didactico (PDG);

• y e estudio Trayecto Cortico pa Maestro di Enseñansa Primario.

Banda di esaki e docentenan di diferente area di formacion di e estudio pa Maestro di Enseñansa Primario a prepara varios actividad interactivo y educativo pa e bishitantenan. Por ehempel actividad cu parachute, actividad den IPA su voedselbos y mucho mas.

Inscripcion pa e Estudio pa Maestro di Enseñansa Primario ta tuma luga online. Durante Open Dag, Studenten Services lo tey presente pa asisti tur persona cu tin pregunta relaciona cu inscripcion y of cu tin mester asistencia cu e proceso di inscripcion via e website www.ipaaruba.com.

Tambe lo tin un IPA Pop-Up Marketplace na unda Universidad di Aruba lo tey presente pa comparti informacion di su estudionan pa tur esnan cu ta interesa. E colaboracion aki ta pa brinda comunidad di Aruba mas momento pa por ricibi informacion di e institutonan.

Na e marketplace, IslaGraze lo tey cu su famoso poffertjes , Aruflamingo cu su dushi platonan surinameo y Sangria 3504 lo ta na encargo di refrescante. Ademas, e banda Mono-Tone lo percura pa crea un dushi ambiente durante e evento.

Pa keda altanto di tur e ultimo desaroyonan encuanto open dag y IPA en general, bishita nos pagina di facebook Instituto Pedagogico Arubano of nos website www.ipaaruba.com.

IPA ta invita henter comunidad di Aruba, specialmente tur persona cu ta interesa pa haci un estudio na IPA pa asisti na nos open dag. Probecha di e oportunidad pa haya tur informacion personalmente y haci pregunta.

Laga nos inspira bo pa scoge pa e profesion di maestro!

Dialuna dia 16 di maart 2026 Instituto Pedagogico Arubano (IPA) ta tene un anochi di informacion pa tur studiante cu tin diploma di havo, vwo of mbo/EPI nivel 4 of cu ta den examenklas di un di e scolnan menciona, cu ta interesa pa haci e estudio pa Maestro di Enseñansa Primario na IPA. E estudio aki ta forma maestro cu ta cualifica pa duna les na mucha di kleuter y of scol basico.

E anochi di informacion ta di 7:00 pm - 8:30 pm y lo tuma luga den Sala Madonna na IPA (Isaac Wagemakerstraat 11, San Nicolas).

Durante e anochi di informacion lo duna informacion general di e estudio pa Maestro di Enseñansa Primario. Ademas di esaki lo elabora riba e procedura y prueba di admision (beroepstest) cu mester cumpli cu ne. E prueba di admision ta obligatorio pa tur studiante cu kier continua nan estudio na IPA. Lo tin varios docente di IPA presente, cu lo duna splicacion di e materianan cu ta forma parti di e prueba di admision. Na final lo tin oportunidad pa haci pregunta.

Bo tin deseo pa bira maestro di enseñansa primario? Esaki ta e momento, bay p’e!

Bo ta buscando un profesion cu ta haci impacto riba e generacion actual y e futuro generacion? Scoge pa e profesion di maestro di Enseñansa Primario. Como maestro bo lo crece riba tereno profesional y personal, bo lo haya satisfaccion di bo trabao y bo lo contribui na futuro di bo pais. Scoge pa e estudio pa Maestro di Enseñansa Primario di Instituto Pedagogico Arubano (IPA) y sea e cambio!

E Estudio pa Maestro di Enseñansa Primario ta forma maestro cu ta cualifica pa duna les na mucha di scol preparatorio y/ of scol basico: un maestro cu ta funciona competentemente den klas, na scol y den comunidad. Tin dos grupo di participante cu por haci e estudio pa Maestro di Enseñansa Primario: 1. Studiante cu tin diploma di sea havo, vwo of mbo nivel 4 of si ta den examen klas di esakinan. 2. Persona cu desde 1 di september 2026 tin minimo 21 aña y cu kier haci un estudio na IPA, pero no tin diploma di sea havo, vwo of mbo nivel 4, por inscribi pa haci e asina yama 21+ Toets. Inscripcion pa e 21+Toets a cera caba for di 12 di januari 2026, dus no ta posibel mas pa inscribi pa 21+ Toets pa aña academico 2026-2027.

Tur informacion di Estudio pa Maestro di Enseñansa Primario ta riba website di IPA. Subi www.ipaaruba.com y click riba opleidingen sigui pa Leraar Primair Onderwijs. Aki lo bo haya informacion di entre otro contenido di e estudio, kico bo por haci despues di e estudio, gasto y procedura di inscripcion.

Banda di esaki nos docentenan di diferente area di formacion a prepara diferente actividad na unda e bishitante lo por participa activamente. Den un siguiente comunicado nos lo elabora riba e actividadnan.

Tur persona cu ta interesa pa haci e Estudio pa Maestro di Enseñansa Primario por inscribi via e website www.ipaaruba.com. Pa por inscribi mester cumpli cu e pago di AWG 100,- y pone como anexo copia di comprobante di pago den formulario digital di inscripcion. Tene na cuenta cu e comprobante mester tin bo nomber riba dje, p’asina nos sa na ken e pago ta pertenece. Na final bo lo ricibi confirmacion di bo inscripcion.

E ultimo dia pa inscribi pa e Estudio pa Maestro di Enseñansa Primario ta dia 1 di mei 2026. Despues di e fecha aki no tin posibilidad mas pa inscribi.

Pa keda altanto di e ultimo desaroyonan di IPA bishita www.ipaaruba.com y sigui nos riba pagina di facebook Instituto Pedagogico Arubano.