Desde IPA su inicio te cu awor, e instituto a conoce varios graduado cu a termina un of mas estudio cu exito y cu awo ta maestro competente y ehemplar den nos comunidad. Un di nos graduadonan ta Jade Padron Faneites. Juf Jade ta maestro na Colegio Conrado Coronel y ta graduado di e estudio pa maestro di Enseñansa Primario di aña 2009 y ta un recien graduado di e estudio Master Educational Needs.

Nos ta den un era di cambio, discubrimento y adaptacion continuo”. Esaki ta expresion di juf Jade. Den e entrevista aki e maestro ta conta pakico ta importante pa un maestro keda desaroya su mes profesionalmente: “Educacion ta dinamico y constantemente den cambio. Den e ultimo decadanan hopi cambio a tuma luga tanto riba e parti teorico como e parti practico di educacion. A discubri y formalisa diferente estudio y teoria cu por uza den practica. Nos tin mas conocemento cu por implementa den klas.”

Banda di tur e diferente teorianan y estudionan cu tin actualmente, tin otro factor cu ta influencia educacion. Pa juf Jade esnan cu tin mas influencia ta tecnologia y sociedad. Segun juf Jade tecnologia actualmente ta hunga un rol importante den e cambionan di forma di duna les y comunica cu e muchanan. E forma di duna les di aña pasa no ta e mesun forma di awendia. E medio- y plataformanan ta mucho mas varia y amplio. Y esaki na su turno ta influencia nos muchanan. E muchanan cu nos tin den klas awendia ta mucha cu a nace den e era digital, cu na su turno ta exigi otro habilidad di e maestro. Juf Jade ta opina cu e muchanan aki mester di un maestro dinamico, activo y actual. Un maestro cu tin e balans entre tecnologia y conocemento teorico.

Un otro factor importante den educacion ta nos sociedad, segun juf Jade. "Mi ta consciente cu sociedad awendia ta pasa den cambio y tin diferente necesidad, pa cual motibo e maestro mester ahusta su forma di duna les. E maestro mester adapta na e muchanan y esaki ta posibel door di unifica e informacion obtenibel cu conocemento propio. P’asina por logra resultadonan satisfactorio pa e alumnonan."

Un otro factor cu juf Jade a menciona ta cu actualmente nos no ta papia solamente di IQ, pero tambe di EQ y di inteligencia multipel: "E maestro mester prepara e alumno cu habilidad teorico y practico. Scol, encarga cu educacion completo, mester prepara e muchanan pa den futuro nan por enfrenta y compronde tur problema actual for di un perspectiva obhetivo, implementando competencia adkiri den un comunidad dinamico. E maestro mester sa e importancia di cada un di e aspectonan aki, pa por crea e diferencia den e mucha. Nos ta den un era di cambio, discubrimento y adaptacion continuo. E unico forma di ta actualisa cu tur esaki, ta door di studia y profesionalisa cada bes mas."

Por ultimo juf Jade ta termina su entrevista cu e quote di John Cotton Dana cu ta bisa “Si te atreves a enseñar no dejes de aprender”.

IPA ta duna recapacitacion y profesionalisacion pa medio di departamento CDPC. CDPC ta para pa Centro pa Desaroyo Profesional Continuo. E departamento aki ta encarga cu enseñansa pa tur maestro y docente, cuminsando di scol preparatorio te cu scol superior.

Den cuadro di e asina yama ‘Get to know IPA’, e instituto lo tene un live session di CDPC dia 12 di november pa 6or di atardi riba e pagina di Facebook Instituto Pedagogico Arubano. Durante e live session lo splica, entre otro, kico ta CDPC y lo trata e cursonan di recapacitacion cu CDPC ta ofrece durante aña academico 2020-2021 y e procedura pa inscribi.

IPA ta invita tur maestro, scol y directiva pa ‘like’ e pagina di Facebook Instituto Pedagogico Arubano, p’asina keda na altura di tur informacion di ‘Get to know IPA’.

Pa mas informacion tambe por bishita nos website www.ipaaruba.com y si ainda bo tin cualkier pregunta, por tuma contacto cu Studenten Services na 5243100.

Ora mucha ta desaroya e ta depende di tur informacion cu e ta persibi y procesa di su ambiente. Esaki e ta haci den un forma explorativo door di mishi, hole, purba, mira y scucha. Pa medio di esaki e por duna nificacion na tur informacion cu el a adkeri. Na scol, varios maestro ta uza material visual y medio di siña pa sostene nan les. Un di e maestronan aki ta Nicole Villada. Juf Nicole ta maestro di klas 1 na St. Franciscus College y ta graduado di e estudio pa Maestro di Enseñansa Primario di aña 2017.

Segun juf Nicole, material visual y medio di siña ta e elementonan clave pa duna les. “E ta respresenta un sosten masha grandi pa e alumno durante e proceso educativo. No solamente bo ta haci bo les mas atractivo, pero tambe bo ta traha riba su conocemento cognitivo, social emocional, auditivo y motorico y awor den tempo moderno, tambe riba e parti tecnologico.” Banda di esaki juf Nicole ta splica cu material visual y medio di siña den les, ta fortalece e comunicacion entre e maestro y su muchanan. “Ora bo ta crea un clima pedagogico sigur den bo klas, bo ta traha riba e comunicacion den klas. Un mucha cu sa cu e les ta bay ta divertido, lo tin un actitud di kier siña y lo participa activamente”. Segun juf Nicole, di e forma aki e mucha lo tin amor pa siñamento enbes di sinti cu e ta obliga pa siña. Un maestro por ripara esaki na e motivacion di su klas.

Cada maestro tin su propio estilo di implementa material visual y medio di siña den les. Juf Nicole ta comparti algun ehempel di material visual cu e ta uza cu su klas durante diferente actividad riba rooster: “Semper mi ta mara mi material na e tema cu nos ta trata y ta haci uzo di elemento cu e alumnonan por ta interesa den dje actualmente. Por ehempel ora di siña un palabra mi ta laga nan trece e obheto for di cas of un potret di dje. Un otro ehempel ta ora di siña e alumnonan nificacion di e palabra ingrediente. Mi ta traha cuki of pizza cu nan den klas. Tambe mi ta uza e programa IPEVO. Esaki ta un real live camara cu mi ta pone riba mi lessenaar. Tur locual mi pone bou di dje e muchanan por wak riba smart TV. E ta practico pa ora di traha den buki di tarea, e muchanan sa precies unda nos ta. Ora di haci experimento tambe mi ta pone e IPEVO pa evita cu tur mucha mester bin dilanti pa wak e experimento”. Como tip pa esnan cu no tin e programa IPEVO, juf Nicole ta bisa cu bo por ‘share screen’ bo telefon cu e smart TV y uza e camara di e telefon p’asina logra e mesun resultado.

Mirando cu un conseho por tin balor significante pa un otro persona, juf Nicole ta termina compartiendo e siguiente mensahe pa studiante actual y futuro studiante di IPA. “Ta importante pa bo tin meta tras di bo material y bon planificacion. No ta pasobra bo tin material bunita pa ora di duna bo les, kiermen cu ta un material cu lo duna bon resultado. Bo material mester tin meta mara na dje. Tambe bo material mester por aporta na contenido di bo les, na meta di bo les of na su evaluacion. Tur recurso didactico cu un maestro uza ta un plus punt pa su les. Ta uza esaki sea pa sostene e les of pa evalua e proceso educativo.

IPA ta invita comunidad di Aruba, specialmente tur studiante di havo, vwo y mbo nivel 4, maestro y tur otro persona interesay, pa cuminsa un estudio of curso na IPA pa ‘like’ e page di Facebook Instituto Pedagogico Arubano, p’asina keda na altura di tur informacion di ‘Get to know IPA’.

Pa mas informacion por bishita nos website www.ipaaruba.com of pagina di Facebook ‘Instituto Pedagogico Arubano’ y si ainda tin cualkier pregunta, por tuma contacto cu Studenten Services na 5243100.

Tin mucha cu diferente nivel y necesidad den enseñansa. Pa e motibo aki lo mester adapta enseñansa a base di diferencia entre e muchanan. Un maestro por haci esaki door di implementa diferenciacion y asina trece variacion den su meta di les, instruccion, tempo, forma di duna les y evaluacion. Di e forma aki e maestro por yuda cada alumno individualmente of grupo di alumno den un necesidad specifico. Si un maestro haci esaki na un forma efectivo, e alumnonan lo siña cu mas placer y lo score miho.

Un di e maestronan cu ta haci diferenciacion den su klas ta Rubella (Bella) de Cuba. Juf Bella ta maestro di klas 1B na Maria Goretti College y ta graduado di e estudio pa Maestro di Enseñansa Primario di aña 2017. Juf Bella ta conta con e ta diferencia den su klas: “Den mi klas mi ta traha cu ‘zorggroepen’. Mi ta señala, durante oferta y instruccion, e alumnonan cu tin dificultad pa compronde e materia. Nan ta ricibi instruccion adicional, a base di nan necesidad.” Pa por brinda e alumnonan les segun necesidad specifico ta importante pa señala for di tempran caba cua ta e alumnonan cu tin mester di extra atencion y sosten. Juf Bella ta haci esaki door di traha na un manera preventivo observando den klas, controla e tareanan frecuentemente y combersa cu e alumnonan for di comienso di aña escolar. Di e forma aki, for di trempan caba, e tin un bista di cua ta e alumnonan cu tin mester di e extra guia. Alabes e ta siña e muchanan traha independiente, p’asina e por tin espacio pa traha cu e ‘zorggroepen’. Segun juf Bella, diferenciacion no ta solamente den klas, pero tambe conhuntamente cu mayor. E ta bisa: “Na momento cu señala cu un mucha tin dificultad cu un materia, mi ta tuma contacto cu mayor pa e mucha ricibi material y instruccion adicional pa cas.”

Termindando e entrevista interesante aki, juf Bella ta añadi: “Ademas di e trabou preventivo, mi lo conseha mi coleganan y futuro coleganan pa sigui siña pa bida largo. Educacion ta move riba un ritmo rapido y pa para dilanti klas y duna lo miho di nos, nos mester adapta nos mes cu tempo. Herment y tecnica nobo por ta e cambionan cu nos mester pa haci nos trabou mas facil, y miho ainda, pa haci educacion un experiencia positivo pa e alumnonan. Por ultimo, corda cu nos ta educa futuro di nos pais. Loke nos haci y e manera con nos haci’e, por crea e diferencia cu nos kier. Laga esaki ta e forsa y motivacion pa duna lo miho di bo na trabou.”

IPA ta invita comunidad di Aruba, specialmente tur studiante di havo, vwo y mbo nivel 4, maestro y tur otro persona interesa y, pa cuminsa un estudio of curso na IPA pa ‘like’ e page di Facebook Instituto Pedagogico Arubano, p’asina keda na altura di tur informacion di ‘Get to know IPA’.

Pa mas informacion por bishita nos website www.ipaaruba.com of pagina di Facebook ‘Instituto Pedagogico Arubano’ y si ainda tin cualkier pregunta, por tuma contacto cu Studenten Services na 5243100.

Bo kier haci e estudio pa Maestro di Enseñansa Primario y no tin diploma sea di havo, vwo of mbo nivel 4 pero bo tin minimo 21 aña? Ata bo chens! Tur persona cu tin desde 1 di september 2021 minimo 21 aña y cu kier haci un estudio na IPA pero no tin e diploma cu IPA ta exigi, ta bin na remarke pa haci e asina yama 21+ Toets. E 21+ Toets ta midi si un persona tin e nivel di havo cu ta necesario pa por studia na IPA. Tene na cuenta cu e 21+ Toets ta conta solamente pa e estudio inicial cu IPA ta ofrece durante aña academico 2021-2022, esta e estudio pa Maestro di Enseñansa Primario.

E 21+ Toets ta consisti di 3 materia entre otro; Hulandes, Matematica y Hende y Comunidad. E test di Hulandes y Matematica lo tuma luga dia 28 di november y Hende y Comunidad dia 5 di december 2020. Si bo pasa e testnan aki cu exito, bo ta bin na remarca pa participa na un trayecto di preparacion pa e test di admision.

Pa informacion general di e 21+ Toets bishita e website www.ipaaruba.com y bay na ‘aanmelden’. Akinan lo bo haya diferente video cu ta contene informacion di 21+ Toets. Ta sumamente importante pa bo mira tur e videonan p’asina bo tin e informacion completo y ta bon informa. Alabes pa bo tin suficiente tempo pa por prepara debidamente y asina engrandece bo chens pa pasa e 21+ Toets cu exito.

Tur persona cu ta interesa pa haci e 21+ Toets por inscribi online via e website di IPA www.ipaaruba.com. Pa por inscribi mester cumpli cu e pago di AWG 80,- y pone como anexo un copia di e comprobante di pago den e formulario digital di inscripcion.

E ultimo fecha pa inscribi pa e 21+ Toets ta, diahuebs, dia 12 di november 2020. Despues di e fecha aki no por inscribi mas pa por participa na e 21+ Toets pa aña academico 2021-2022.

Pa mas informacion por bishita nos website www.ipaaruba.com of pagina di facebook Instituto Pedagogico Arubano of por tuma contacto cu Studenten Services na 5243100.