A bira un tradicion di cada 4 aña di IPA pa organisa un foro politico prome cu eleccion di Parlamento. E meta di e foro aki ta pa duna cada representante di partido e oportunidad pa comparti su vision encuanto desaroyo di enseñansa den siglo 21. Alabes pa e comunidad di IPA y tur partners den enseñansa haya sa kico ta e plannan cu e partido tin pa loke ta trata enseñansa en general.

A opta pa uza durante e foro politico diferente forma didactico cu e docentenan ta uza na IPA. Di e manera aki e representantenan por experiencia e uzo di forma di traha activo cu IPA ta promove bou di su studiantenan. E foro a inicia cu un icebreaker na unda pa medio di e programa Kahoot e representantenan por a participa na un quiz basa riba preparacion cu nan a haci riba tereno di enseñansa. Di e forma aki e representantenan por a relaha y aclamatisa un poco prome cu e foro cuminsa.

E foro mes tabata consisti di tres tanda. Durante e prome tanda a haci diferente pregunta relaciona cu enseñansa entre otro: enseñansa den siglo 21, Scol Arubano Multilingual, PEN2030, Infrastructura y Movecion y Salud. E preguntanan haci, ta preguntanan acumula di IPA su propio studiante- y docentenan. Siñamento den siglo 21 ta rekeri cierto habilidadnan. Algun di e habilidadnan aki ta, entre otro: pensamento critico, creatividad, comunicacion y colaboracion. Nos muchanan tin cu siña traha hunto, comunica y colabora pa bin cu solucion creativo. Esaki tambe ta esencial pa bon gobernacion. Pa e motibo aki den tanda dos a scoge pa e forma didactico siña di forma colaborativo (samenwerkend leren). A agrupa e representantenan a base di tira lot. Esnan cu tin e mesun number a forma un coalicion. E coalicionnan cu a keda forma ta: grupo 1 RAIZ, MAS, PPA y PP., grupo 2 ACCION21, UPP, MEP y AVP., grupo 3 CURPA, RED, POR Y HTC. Cada grupo a haya un casus cu nan mester a discuti hunto y presenta despues na e publico.

E ultimo tanda tabata encera turno liber unda e representantenan por a comparti of convence publico pakico mester vota pa nan of pa nan partido. A finalisa e foro cu evaluacion di proceso unda e representantenan mester a expresa den un palabra con nan a experiencia e foro.

Naturalmente e publico cu a sigui e foro politico di cerca, por a yena un encuesta via e programa Mentimeter, caminda por evalua e representantenan riba diferente tereno entre otro: presentacion, preparacion y contenido. Por ultimo e publico por a scoge pa kende nan lo a vota a base di e presentacion di representante. E partidonan cu a resalta tabata MEP, MAS y RAIZ.

Un palabra di gratitud ta bay na tur e representantenan pa acepta e invitacion di IPA y participa activamente na e foro: Flora Petronilia (Accion 21), Natalie Geerman (PPA), Solangel Dinmohamed-Laclé (MAS), Ivan Yarzagaray (UPP), Sue-Ann Ras (MEP), Gilbert Webb (HTC), Anchelino Vrolijk (POR), Ryçond Santos do Nascimento (AVP), Gisele-Mireille Sint Jago (PP), Max Robert (CURPA), Ivan Croes (RAIZ), Armando Lampe (RED). Tambe IPA ta gradici e team di studiante y personal cu a organisa e foro politico. Masha danki di curason.

Cuminsando e biahe pa un aventura nobo y grandi, nunca ta parce di bin sin temor. E riesgo di trata di tin exito den algo nobo ta mescla cu presion di hacie bon y sinti comodo. E sentimento aki ta masha normal. Pakico? Pasobra bo ta bay drenta un etapa cu bo no ta familiar cu ne, un etapa cu lo trece experiencia nobo y sigur cu lo tin su reto cu ne.

Rocalia Lampe, ta studiante di e estudio pa maestro di Enseñansa Primario y actualmente ta den e fase di finalisacion di su estudio. Cu hopi esfuerso y perserverancia Rocalia ta den proceso di cumpli cu su deseo di bira maestra di scol. Awe e kier encurasha tur persona cu ta desea di bira maestro, pa hacie!c

Rocalia su soño di mas grandi ta pa bira maestra di scol primario. Na momento cu el a haya sa cu el a logra pasa e test di admision y cu e ta un studiante oficial na IPA, e tabata sa cu su futuro ta depende di dje mes: "Mi tabata sa di e momento ey cu awo ta cuestion di traha duro pa logra mi meta, e porta ta habri, t'ami mester lucha awo. Enfoca riba e estudio, e profesion y no laga e peso di e estudio spanta mi".

Cerca Rocalia sentimento di miedo y/of presion no a domina, pero un curiosidad enorme ta loke a presenta. Rocalia a sa di tin un actitud activo y a tuma contacto cu su amistadnan cu tabata na IPA caba p’asina prepara pa su etapa nobo: “Mi tabata hiba combersacionnan casual cu mi amiganan p’asina mi haya un bista general di loke ta spera mi pa e cuater añanan binidero. Tambe pa mi ricibi ‘tips and tricks’ pa ora cu mi cuminsa cu mi estudio na IPA”.

Durante su estudio tin dos ingrediente clave cu a mantene e focus di Rocalia firme. E prome ta planificacion. Segun Rocalia planificacion ta super importante p’asina bo structura e momento cu bo ta dedica na bo estudio, tempo cu bo ta dedica na bo famia y bo ciudo propio. E ta opina cu tempo pa relaha mentalmente y fisicamente ta yuda bo yega na miho resultado.

E di dos ta e pensamento positivo. Esaki ta algo cu Rocalia a siña for di su mama y famia. Pues, ta un habilidad cu el a crece cu ne y a keda practica. Rocalia ta bisa: “Na caminda pa nos meta, nos ta encontra diferente reto, un mas dificil cu otro y IPA sigur no ta un exepcion. Nos tin e poder pa maneha esaki. Sea bo ta wak e como un ‘stepping stone’ of bo ta lag’e kibra bo. Ami semper a scoge pa e prome y abo?”.

Rocalia ta termina bisando: “Nunca lubida e rason dicon na prome instante bo a scoge pa inicia bo estudio na IPA.”

Bo tin deseo pa bira maestro of tin duda? Mane’ Rocalia a bisa: Hacie! Inscripcion pa e estudio pa maestro di Enseñansa Primario ta cera dia 12 di februari 2021. Despues di e fecha aki no por inscribi mas pa aña academico 2021-2022. Tene na cuenta cu solamente studiante den examenklas of graduado di havo, vwo of mbo nivel 4 por inscribi. Esaki pa motibo cu inscripcion pa e 21+Toets a cera caba for di 12 di november 2020, pues no ta posibel mas pa inscribi pa 21+ Toets pa aña academico 2021-2022.

Pa inscribi bishita e website www.ipaaruba.com, bay na aanmelden y scoge pa beroepstest. Riba e pagina aki lo bo haya informacion general di beroepstest. Tambe instruccion pa loke ta trata procedura di inscripcion cu lo tuma luga online. Tuma tempo pa lesa e informacion, pasobra esaki ta sumamente importante pa por facilita e proceso di inscripcion y preparacion pa haci beroepstest.

Pa mas informacion tambe por bishita nos website www.ipaaruba.com y si ainda bo tin cualkier pregunta, por tuma contacto cu Studenten Services na 5243100.

Mundialmente ta conoci cu tin mas maestra cu maestro den enseñansa. Cu 20 aña di edad, studiante Nathan Winterdal a inicia e estudio pa maestro di Enseñansa Primario na Instituto Pedagogico Arubano (IPA). Actualmente e ta den e fase di finalisacion di su estudio y den corto tempo lo tin su propio klas. Nathan ta comparti cu nos su motibo pakico e como ser masculino a scoge pa e profesion di maestro: “Un maestro tin un efecto pa eternidad, e nunca no por bisa unda su influencia ta stop. Tambe ser maestro ta laga bo duna les di bida cu nunca bo alumnonan lo lubida. Pa nan bo ta un persona importante cu tin influencia riba nan decision, actitud, fortalesa, perseverancia y imaginacion.”

Tin un dicho ta bisa “Find a job you enjoy doing, and you will never have to work a day in your life”. Un profesion cu bo tin goso den dje, lo haci bo bida mas placentero. Pues scoge pa un profesion cu bo tin pasion y amor p'e y no pa e benificionan cu bo ta pensa cu e profesion por trece cu ne. Nathan ta comparti cu nos su satisfaccion di mas grandi como maestro na scol: “Maestro ta un bunita profesion. Bo lo yuda cambia un mucha su bida. Bo ta bay yud’e crece y siñ’e cos p’e bira un miho ser humano. Lo bo, entre otro, siñ’e norma y balor cu nos mester sa y aplica pa funciona den nos sociedad. E miho recompensa cu bo por haya ta sa con hopi bo a yuda un mucha. Tin biaha scol ta manera un refugio pa un mucha. Abo como maestro ta mustr’e un otro banda di bida cu por ta e no ta wak of haya na cas. Muchanan sa pasa den duro sin cu bo sa y abo como maestro lo brinda un otro aspecto di bida unda e futuro ta mas liber y cla. Eynan bo ta hinca e mucha den un bon caminda. Den futuro bo por wak e cu un bon trabou, bo sa cu bo tawata parti di e crecemento ey.”

Por ultimo Nathan kier curasha pa scoge pa e profesion di maestro: “No tene miedo of tin duda di e profesion aki paso cu tempo nos mes ta sigui crece den nos pensamento y conocemento. Ami ta anima bo bay den e direccion aki pa yuda nos muchanan bay den e bon caminda for di chikito caba. Yuda traha e base y fundeshi na e muchanan pa den futuro nan para stabiel riba nan mes. Na final di dia abo sa cu bo a hunga un rol importante den e mucha su bida.”

Bo ta tribi di tuma e reto mane Nathan? Inscripcion pa e estudio pa maestro di Enseñansa Primario ta cera dia 12 di februari 2021. Despues di e fecha aki no por inscribi mas pa aña academico 2021-2022. Tene na cuenta cu solamente studiante den examenklas of graduado di havo, vwo of mbo nivel 4 por inscribi. Esaki pa motibo cu inscripcion pa e 21+Toets a cera caba for di 12 di november 2020, pues no ta posibel mas pa inscribi pa 21+ Toets pa aña academico 2021-2022.

Pa inscribi bishita e website www.ipaaruba.com, bay na aanmelden y scoge pa beroepstest. Riba e pagina aki lo bo haya informacion general di beroepstest. Tambe instruccion pa loke ta trata procedura di inscripcion cu lo tuma luga online. Tuma tempo pa lesa e informacion, pasobra esaki ta sumamente importante pa por facilita e proceso di inscripcion y preparacion pa haci beroepstest.

Pa mas informacion tambe por bishita nos website www.ipaaruba.com y si ainda bo tin cualkier pregunta, por tuma contacto cu Studenten Services na 5243100.

Bo kier aporta na e formacion di nos muchanan? Bo ta un persona cu por carga responsabilidad y traha independientemente of den ekipo? Bo ta curioso y creativo? Si e contestanan ta si, e ora e estudio pa maestro di Enseñansa Primario, cu IPA ta ofrece, ta e estudio ideal pa bo. E estudio pa maestro di Enseñansa Primario ta forma maestro cu ta cualifica pa duna les na mucha di scol preparatorio y/ of scol basico: un maestro cu ta funciona competentemente den klas, na scol y den un ambiente social.

Tin dos ruta pa por yega na haci e estudio di maestro di Enseñansa Primario, pa medio di:

• diploma di sea havo, vwo of mbo nivel 4 (Si bo ta den examenklas di havo, vwo of mbo nivel 4 tambe bo lo tin cu inscribi di awo);

• 21+ Toets. Inscripcion pa e 21+Toets a cera caba for di 12 di november 2020, dus no ta posibel mas pa inscribi pa 21+ Toets pa aña academico 2021-2022.

Bo tin diploma di sea havo, vwo of mbo nivel 4 of ta den examenklas y bo ta sinti bo yama pa haci e estudio aki y ta desea di inscribi? Bishita e website www.ipaaruba.com, bay na aanmelden y scoge pa beroepstest. Riba e pagina aki lo bo haya informacion general di beroepstest. Tambe instruccion pa loke ta trata procedura di inscripcion cu lo tuma luga online. Tuma tempo pa lesa e informacion pasobra esaki ta sumamente importante pa por facilita e proceso di inscripcion y preparacion pa haci beroepstest. E ultimo dia pa inscribi pa e estudio pa maestro di Enseñansa Primario ta 12 di februari 2021. Despues di e fecha aki no por inscribi mas pa aña academico 2021-2022. Tene na cuenta cu solamente studiante den examenklas of graduado di havo, vwo of mbo nivel 4 por inscribi pa e estudio pa maestro di Enseñansa Primario.

Pa mas informacion tambe por bishita nos website www.ipaaruba.com y si ainda bo tin cualkier pregunta, por tuma contacto cu Studenten Services na 5243100.