Wow, ki tremendo ambiente IPA a pone den Jungle Vibes. ‘Feel good and nice’ ta un subestimacion di loke e studiantenan, docente y personal di sosten a sinti.

Recientemente departamento Bureau Voorlichting en Sociale Activiteiten (BUVOS) di IPA a organisa un actividad social cu a hiba e nomber Think Outside the Box Game Night. Meta principal di e actividad tabata pa crea espacio pa ciudo y amor propio di cada miembro di IPA y fortalece e union den e instituto den un ambiente placentero.

E weganan tabata den man di Gewoon Pa Pret Entertainment cu no solamente a pone studiante, docente y personal di sosten pensa ‘out of the box’, pero a pone nan haci tarea den ekipo tambe.

Un total di 8 grupo a bini tur cu tin pa bataya contra otro p’asina bay cu e titulo maximo di e anochi. Competencia tabata fuerte mirando cu e gruponanan na varios momento tabata cabes cabes cu otro.

Resultado di e game night ta como lo siguiente:

• Ganado absoluto: Hot Shots

• Segundo luga: The Innovators

• Di tres luga: Party Crashers

• Miho uniforma: Wonder Teachers

• Grupo disciplina: Head Peace

• Grupo ambiente: Maripositas

• ‘Outside the Box’: Captain’s Crew

• Bon mucha: The Believers

Masha pabien na cada un di e gruponan. BUVOS ya a cuminsa cu planificacion di su siguiente actividad social y ta curioso pa sa si tur grupo lo acepta e reto! Esaki tambe ta priminti di ta uno divertido.

Un danki special ta bay na tur e sponsornan cu a contribui na IPA su actividad social. Ta trata di Setar NV, Protegy Trading, Bellisima Boutique, Bombshell & Co., Shelo y Tera, Naty Letters, The Zero Waste Stop, Aruba’s Bee Haven, Blizz Gifts, Diversi, Heaven in a Jar & Sweets y PMS Box. Tambe un palabra di gratitud ta bay na Jerino Bass pa facilita IPA cu Jungle Vibes. E comunidad di IPA no tin suficiente palabra pa gradici boso pa boso aporte. Masha danki pa haci IPA su actividad social un exito rotundo! Bishita e pagina di facebook Instituto Pedagogico Arubano y wak pa bo mes. Apesar di tur cos, potret ta bisa mas cu palabra!

Ata bo ultimo oportunidad pa inscribi pa aña academico 2023-2024!

Bo kier aporta na e formacion di nos muchanan? Bo ta un persona cu por carga responsabilidad y traha independientemente of den ekipo? Bo ta curioso y creativo? Si e contestanan ta si, e ora e estudio pa maestro di Enseñansa Primario, cu IPA ta ofrece, ta e estudio ideal pa bo. E estudio pa maestro di Enseñansa Primario ta forma maestro cu ta cualifica pa duna les na mucha di kleuter y of basisschool.

Inscripcion ta tuma luga online. Bishita www.ipaaruba.com, bay na aanmelden y scoge pa beroepstest Primair Onderwijs y sigui e instruccion. E ultimo dia pa inscribi pa e estudio aki ta 17 di februari 2023. Despues di e fecha aki no por inscribi mas pa aña academico 2023-2024 pa motibo cu e beroepstest (testnan di admision) lo tuma luga dia 25 di februari y 4 di maart. Ta consehabel pa inscribi mas pronto cu ta posibel p’asina bo tin suficiente tempo pa prepara y termina e beroepstest cu exito!

Tene na cuenta cu solamente studiante den examenklas of graduado di havo, vwo of mbo nivel 4 por inscribi pa e estudio pa maestro di Enseñansa Primario. Inscripcion pa e 21+Toets a cera dia 10 di october 2022, pues no ta posibel mas pa inscribi pa 21+ Toets pa aña academico 2023-2024.

Pa keda altanto di e ultimo desaroyonan di IPA bishita nos website www.ipaaruba.com y sigui nos riba e pagina di facebook Instituto Pedagogico Arubano.

Tur aña Instituto Pedagogico Arubano, IPA, ta ofrece dos programa minor. Un minor ta un stage cu studiantenan di enseñansa superior (HBO) of universidad ta bin core na Aruba pa un temporada di algun luna. Esakinan por ta studiante di Universidad di Aruba of cualkier otro pais. E minor ta titula Globalization, Diversity, Multilingualism and Education, esta un International Fall Minor di september te cu januari y un International Spring Minor di februari te cu juni. Recientemente un grupo di 17 studiante di Hulanda y Belgica a termina cu nan programa di Minor di 5 luna na IPA. E studiantenan cu a termina nan minor cu exito tabata: Jesse Spekle van Thomas More Hogeschool, Sagine Croes van Avans Hogeschool Breda, Bas van de Pijpekamp en Kees Jonkman (Hogeschool Arnhem, Nijmegen), Simon Thorez, Margaux Dubois y Laura Werts (Ecole Condorcet), Chris Maduro y Anwar Henriquez (Aruba University). Hogeschool Rotterdam tabata tin 7 studiante cu a participa; Cornelia Visser, Quilomy Muyale, Ali ben Aalam, Annemieke Bogard, Mariska van Rooijen en Puck Verschoor.

IPA ta gradici tur e solnan na Aruba cu a habri nan pporta hancho pa ricibi y guia e studiantenan aki. Esakinan tabata: Fransiscus basischool, Dominicus college, Colegio Arubano, Colegio Nigel Matthew, International School Aruba, Maria College.

Un pabien ta bay na nan tur cu nan exitoso minor aki na Aruba na IPA.

Recientemente IPA a ricibi bishita di Robbert Dijkgraaf, Minister di Enseñansa, Cultura y Ciencia di Hulanda, hunto cu e representantenan di VNO. Esaki ta den cuadro di e proyecto Kibrahacha cu ta un proyecto tocante ‘Samen Opleiden’ entre e islanan ABC. Na Aruba tin varios scol primario cu ta traha cu IPA den e proyecto aki p'asina conhuntamente educa e studiantenan di IPA, den practica.

Meta di e encuentro aki tabata pa wak con tur e diferente actornan ta experiencia proyecto Kibrahacha y alabes cera conoci cu Minister di Enseñansa di Hulanda. Durante di e encuentro a sondea e posibilidad y forma con Hulanda por sigui contribui na e desaroyo positivo aki.

E mainta a inicia cu un presentacion di drs. Marilyn Richardson, directora general di IPA. drs. Richardson a splica en corto tocante e estudionan cu IPA ta ofrece, e colaboracion cu e instituto tin cu diferente instituto/ instancia local y internacional. drs. Richardson a elabora tambe riba e vision y meta pa futuro di IPA y e retonan cu esakinan ta trece cu ne.

Minister Dijkgraaf a indica cu e ta reconoce cu e retonan cu comunidad y enseñansa na Aruba tin tambe ta hunga un rol na Hulanda, y cu e ta interesa pa busca poisibilidad pa colabora y wak con tur partido por yuda otro anda cu e retonan aki. El a indica tambe cu ta explora e posibilidad di un Koninkrijks Beurs pa duna oportunidad pa tur studiante den Reino Hulandes core stage den e paisnan den Reino.

Siguientemente, e lider di proyecto Kibrahacha, drs. Marisol Croes a conta cu Kibrahacha tin efecto positivo riba e colaboracion entre e institutonan y scol primario.

Tambe tabatin dos studiante di aña tres di estudio pa maestro di Enseñansa Primario di IPA presente, esta Nataly Tobar y Thyara Doornkamp. E studiantenan a conta cu nan a experiencia e cambionan cu a tuma luga door di proyecto Kibrahacha na un manera sumamente positivo. Un di e cambionan ta e acoplacion entre teoria cu ta ricibi na IPA y e contenido di e periodo di practica den e mesun semester.

E forma cu Kibrahacha ta organisa riba e islanan ABC lo por fungi como ehempel pa Hulanda den nan colaboracion regional.