Ambiente deportivo y bon vibracion ta loke cu e comunidad di IPA y su invitadonan a trece den Veld di Britannia.

Departamento Bureau Voorlichting en Sociale Activiteiten (BUVOS) di Instituto Pedagogico Arubano (IPA) a organisa un actividad social pa su studiantenan y personal. Locual cu a haci e actividad aki extra special ta cu tur maestro den veld cu ta yuda guia nos studiantenan tabata invita pa pasa un rato ameno cu e comunidad di IPA. Di e forma aki nos a gradici nan primaremente pa e guia y dedicacion na nos studiantenan. Tambe pa e amor incondicional cu nan tin pa nan profesion.

E actividad tabata den forma di un torneo di kickball cu e tema ‘Kick the stress away’. Un tema cu ta recorda nos, cu nos tin di crea momento pa ‘distress’ p’asina nos hiba un bida saludabel y duradero.

E ekiponan a bataya fuerte contra otro y e fanaticadanan tabata ‘all out’ cu nan team.

E resultado final ta lo siguiente: Prome luga: ekipo Pink Strikers Segundo luga: ekipo The Blue(s) Brothers and Sisters Tercer luga: ekipo Yellow Ballers

Nos studiante y docentenan ta conoci pa personanan cu ta creativo. Palabra di pabien ta bay na e ekipo The Blue(s) Brothers and Sisters cu a luci espectacular den nan uniform. Boso creatividad y entusiasmo a laga e evento haya un briyo extra.

E actividad aki seguramente no tabata posibel sin cooperacion di diferente sponsor cu a kere den e evento aki y cu a yuda IPA sin pensa dos biaha. Nan ta: Subway, Chanti’s y Domino’s Pizza. Comunidad di IPA no tin palabra pa gradici boso pa boso aporte. Masha danki di curason.

Rebiba e momento y tira un bista riba nos pagina di facebook Instituto Pedagogico Arubano pa bo mira e potretnan capta durante e evento.

Bo ta desea di haci e estudio pa Maestro di Enseñansa Primario pero pa motibo di circumstancia di bida bo no a logra termina sea havo, vwo of mbo nivel 4? Cu 21+ Toets bo deseo por bira realidad! Tur persona cu tin desde 1 di september 2025 minimo 21 aña y cu kier haci un estudio na Instituto Pedagogico Arubano (IPA), pero no tin diploma di sea havo, vwo of mbo nivel 4, ta bin na remarca pa haci e asina yama 21+ Toets. 21+ Toets ta midi si bo tin e nivel di havo cu ta necesario pa por studia na IPA. Si bo logra pasa 21+ Toets cu exito bo por inscribi pa un estudio inicial cu IPA lo ofrece durante aña academico 2025-2026. Asina cu bo inscribi bo ta bin na remarca pa participa na e test di admision (beroepstest) y e programa preparatorio (voorprogramma) cu lo tuma luga durante aña academico 2024-2025. Si bo logra pasa e test di admision cu exito y completa e programa preparatorio bo por cuminsa cu bo estudio na augustus 2025.

21+ Toets ta consisti di tres materia entre otro: 1. Hulandes, 2. matematica, 3. hende y comunidad. 21+ Toets ta tuma luga diasabra 13, diamars 16 y diasabra 20 di april 2024.

Inscripcion

Tur persona cu ta interesa pa haci 21+ Toets por inscribi via e website www.ipaaruba.com. Pa por inscribi mester cumpli cu pago di AWG 80,- y pone como anexo un copia di e comprobante di pago den e formulario digital di inscripcion. Tene na cuenta cu e comprobante mester tin bo nomber riba dje, p’asina nos sa na ken e pago ta pertenece. Na final bo lo ricibi un confirmacion di bo inscripcion. E ultimo dia pa inscribi pa 21+ Toets ta 31 di januari 2024. Despues di e fecha aki no tin posibilidad mas pa inscribi.

Pa keda altanto di e ultimo desaroyonan di IPA bishita www.ipaaruba.com y sigui nos riba e pagina di facebook Instituto Pedagogico Arubano.

IPA su actividad social; un exito total.

Diabierna ultimo tabatin bochincha, gritamento pa number seis y harimento sin fin na Centro di Bario Brazil (CDBB): IPA atrobe!

Departamento Bureau Voorlichting en Sociale Activiteiten (BUVOS) di Instituto Pedagogico Arubano (IPA) a organisa un actividad social pa su studiantenan y personal. E actividad tabata den forma di un Live Mens Erger Je Niet (MEJN) cu a hiba e nomber; Lachen, gieren, brullen, maar erger je niet. Meta principal di e actividad tabata pa crea espacio pa ciudo y amor propio di cada miembro di IPA y fortalece e union den e instituto den un ambiente placentero.

E ekiponan bao guia di e comision di CDBB a bataya fuerte contra otro. Tabatin momento cu tabatin e mesun cantidad di persona den cas. E ekiponan a pensa strategia, conta ‘moves’ y tuma decision hunto p’asina wak ken ta bay cu e titulo maximo di e evento.

• Prome luga: ekipo Taalfoutjes

• Segundo luga: ekipo Rediculous

Nos studiante y docentenan ta conoci pa personanan cu ta crea ambiente tur caminda. E ekipo cu a resalta cu su bochincha ta e ekipo cu a yama nan mes Yellow Power.

Masha pabien na cada un di e ekiponan. BUVOS ya a cuminsa cu planificacion di su siguiente actividad social y ta curioso pa sa si tur ekipo lo acepta e reto! Esaki tambe ta priminti di ta uno divertido.

E actividad aki seguramente no tabata posibel sin cooperacion di diferente sponsor cu a kere den e evento aki y cu a yuda IPA sin pensa dos biaha. Nan ta: Valemarie Skin Care, Setar NV. Pooki Bodique, Sende Candles, Protegy Trading y Local Store. Comunidad di IPA no tin palabra pa gradici boso pa boso aporte. Masha danki di curason.

Comunidad di IPA sowieso ta buta ambiente na tur actividad social. Bishita e pagina di facebook Instituto Pedagogico Arubano y wak pa bo mes. Apesar di tur cos, potret ta bisa mas cu palabra!

Un grupo di 16 studiante pasiona a logra completa e minor "Globalisation, Diversity, Multilingualism & Education" na IPA (International Programme Aruba) cu exito. Nan a inicia e minor desafiantia aki na september. Cu orguyo nan ta mira patras riba un final exitoso di nan periodo di estudio. Dia 12 y 19 di januari nan a presenta nan portofolio y trabou di investigacion durante nan presentacion final na IPA.

E studiantenan dedica aki ta bini di diferente universidad: Hogeschool Rotterdam (PABO), Hogeschool Thomas More, Hogeschool Windesheim, y dos studiante Arubiano Maud Celaire y Kimberlie Jansen di Haagse Hogeschool.

Durante e periodo aki, e studiantenan a haya experencia balioso haciendo nan practica na diferente scol: Mon Plaisir basisschool, Basisschool de Schakel, Colegio Pastor Kranwinkel, Rosario College, International School Aruba, San Antonio Mavo, y Abraham de Veer Mavo. Nos ta duna reconocemento y gratitud na e scolnan pa nan guia y disponibilidad.

E nombernan di e studiantenan y e topiconan di nan trabounan di investigacion:

• Marlous Bode - Multilingualidad den kleuterklas

• Siebe Mels – Gamificacion/wega den enseñansa

• Laura Koornstra - Tarea creativo den enseñansa di NT2

• Lotte Tillema - Formanan di trabou cooperativo

• Cheyenne Baanvinger & Vincent Sels - Motivacion den enseñansa na Aruba

• Floor van Dijk - Movecion den enseñansa

• Lotte Brouwers - Influensia di evaluacion riba confiansa propio

• Lenthe Versendaal - Influencia di entrada/salida iregular riba e ambiente di klas

• Mirte Hoogedoorn - Dislexia na e scol di practica na Aruba

• Kimberly Jansen & Maud Celaire - Multilingualidad den enseñansa Arubano

• Sandhya Khusial - Desaroyo di NT2 den idioma Hulandes

• Sanne van Dijk & Anne Lodder - Desaroyo di identidad na Colegio Pastor Kranwinkel

• Arhomi Illidge - Influencia di ambiente di cas riba rendimento di siñamento (The influence of the home environment on the learning performance).

E logro aki ta mustra e diversidad y dedicacion di e studiantenan, caminda nan contribucion ta priminti un impacto balioso den enseñansa. Nos ta felicita nan cordialmente cu e exito completando e capitulo aki di nan biahe academico.