Vragen? +297-524 3100 info@ipaaruba.com

Studiantenan di Hulanda a completa nan programa di Minor Perspectiva Mundial na IPA

Instituto Pedagogico Arubano (IPA) ta ofrece anualmente un programa di Minor na balor di 30 ECTS special pa e studiantenan internacional, particularmente den Reino Hulandes. E programa aki a tuma luga durante e periodo di februari te juni 2019.

E studiantenan cu a participa ta: Yasmin Scheenhart, Janessa Anastatia, Laura Ploeg y Bart Kornblum di Hogeschool InHolland y Juleidy Camarenda Bautista di Hogeschool Arnhem Nijmegen. Juleidy ta ex alumni di Colegio Arubano. E studiantenan a participa cu hopi entusiasmo na e minor programa Globalization, Diversity and Multilingualism.

E enfoke di e programa di minor tawata riba Desaroyo Sostenibel den Enseñansa y den mundo general unda a delinea e asina yama cuater P’s di sostenibilad cual ta ‘Planet, People, Profit y Participatory Governance’. E meta di e programa tambe tawata pa e studiantenan amplia nan horizonte, cera conoci cu e cultura y sistema di enseñansa di Aruba y haya conocemento didactico pedagogico, investigacion y tambe intercambia conocemento y experiencia. E programa tabata consisti di diferente actividad multidisciplinario unda e studiantenan a participa na un serie di tayer, facilita pa varios docente di IPA, riba diferente tereno manera multilingualismo den enseñansa, sistema y maneho di enseñansa, investigacion y ciudadania.

Nan a haci nan practica na diferente scol basico na Aruba, unda nan a realisa proyecto y haci investigacion relaciona cu e topiconan ya menciona. E studiantenan a haci nan practica na Mon Plaisir, Fransicus College, Rosario College y Fontein kleuterschool.

Banda di esaki, nan a participa na diferente excursion entre otro Museo di Industria, Parlamento di Aruba, Gobierno di Aruba, Aruba DOET, excursion Rooi Fluit, excursion cu cabay for di Rooi Fluit te cu Bushiribana y e centro di ciudadnan di Oranjestad y San Nicolas.

E studiantenan a experiencia IPA y nan scol di practica como uno sumamento educativo, informativo y creativo. Nan a duna di conoce cu nan pasantia na Aruba tabata rico na experiencia. IPA ta desea e studiantenan di Minor un bon continuacion y finalisacion di nan estudio na Hulanda.