Vragen? +297-524 3100 info@ipaaruba.com

Maestro

profesion for di bo curason!

Get to know IPA
IPA ta invita comunidad di Aruba pa participa na su actividad informativo ‘Get to know IPA’

Maestro ta un profesion noble cu ta forma caracter y futuro di un individuo. E ta un profesion cu, si eherce cu pasion, ta alegra bo curason. Bo mester ta un persona cu ta gusta ta rondona di mucha of hoben, y lo desea di traspasa conocemento na otro. Ta p'esey, como maestro, bo tin entre otro e bunita tarea pa inspira, guia y motiva nan pa desaroya y saca lo miho di nan potencial. 

Pa motibo di e pandemia di COVID-19 e tradicional Dia Publico di IPA, cu e comunidad di Aruba ta conoci cu ne, lo tuma luga den un forma diferente. E aña aki e lo tuma luga riba e pagina di Facebook Instituto Pedagogico Arubano y ta hiba e nomber ‘Get to know IPA’. E actividad aki lo tuma luga durante e periodo di 2 pa 12 di november 2020 y ta consisti di video di diferente estudio y curso, cu IPA lo ofrece durante aña academico 2021-2022. Esakinan ta e estudio pa maestro di Enseñansa Primario, curso Pedagogico Didactico (PDG) y Master of Science in Education. Banda di esaki lo duna informacion di e cursonan di recapacitacion cu Centro pa Desaroyo Profesional Continuo lo ofrece durante e aña academico aki.  Alabes lo tin sesion bibo di pregunta y contesta di e estudionan ya menciona. Tambe lo tin oportunidad pa combersa cu e studiantenan di IPA. Di e manera aki bo por scucha for di e studiantenan con nan ta experiencia estudio na IPA y sigur haya bon tip con pa studia exitosamente. En corto, bo lo experiencia e ambiente estudiantil!

IPA ta invita comunidad di Aruba, specialmente tur studiante di havo, vwo y mbo nivel 4, maestro y tur otro persona interesa pa cuminsa un estudio na IPA pa ‘like’ e pagina di Facebook Instituto Pedagogico Arubano, p’asina bo keda na altura di tur informacion di ‘Get to know IPA’.

Pa mas informacion por bishita nos website www.ipaaruba.com of pagina di Facebook ‘Instituto Pedagogico Arubano’ y si ainda bo tin cualkier pregunta, por tuma contacto cu Studenten Services na 5243100.
Aanmeldings-

procedure

Caracteristicanan

di un maestro

Valerie Adonis

Valerie Adonis kier motiva; esey ta encera duna empuhe pa studia y logra meta den bida. Pues e habilidad di por motiva ta sumamente esencial pa e maestro como educador.
“E tarea mas grandi como maestro ta pa motiva e hoben den su estudio. Semper purba di ta un 'role model' pa e hoben. Conoce bo studiantenan y combersa tur dia un rato cu nan. Esey por haci un diferencia den e hoben su futuro!”

Isabel Santana Cruz

Un di e habilidadnan esencial pa un bon maestro ta creatividad. Studiante Isabel ta opina lo siguiente: “Ta necesario pa un maestro ta creativo p’asina innova e curiculo y haci’e mas atractivo pa su alumnonan.  Tambe ta importante pa un maestro duna su alumnonan e espacio pa ta creativo. Creatividad tin hopi beneficio. Creatividad ta multidisciplinario, e ta laga un mucha of maestro expresa su mes y ta promove habilidad di soluciona problema y hopi mas.”

Cheritza Tromp

Cheritza ta amplia tocante flexibilidad, habilidad esencial pa un bon maestro.“Como futuro maestro mi kier ta un docente flexibel p’asina mi yega mas cerca di mi studiantenan. Flexibel pa nan gara confiansa p’asina e relacion di docente pa alumno por ta mas directo y por traha mas na bienestar di e alumno su necesidad.”

Shawn Tromp

Shawn Tromp ta haya cu un bon maestro ta un bon guia. Ser guia ta un di e habilidadnan esencial di ta maestro.
“Mi ta kere cu cada mucha ta den desaroyo psicologico y emocional. E maestro competente ta esun cu por guia e alumno, no solamente pa estudio, sino pa bira un ciudadano ehemplar den nos comunidad.”

Tyfanny Garcia

“Educa cu amor,” ta expresion di Tyfanny Garcia. Esaki ta nifica cu amor ta un habilidad cu e maestro mester pa duna educacion.
Un berdadero maestro ta uno cu ta duna enseñansa di curason. E bon maestro ta stima mucha y ta mira nan bienestar na prome luga. Manera e quote ta bisa siña ta toca un bida pa semper.

Samantha Setrodjemino

Samantha ta e studiante cu a elabora tocante pasenshi. Remarcabel ta cu e ta un persona cu tin hopi pasenshi pa traha cu mucha.
Definicion universal di pasenshi ta: e habilidad pa keda calmo den tur situacion.
Como maestro ta importante pa obtene un resultado positivo den circunstancia desagradabel cu ta dificil pa cambia.

Norine Werleman

Un di e habilidadnan escencial pa un bon maestro ta inspira. Norine ta un studiante talentoso cu ta duna e siguiente contenido na e palabra inspira. “Como maestro nos ta esunnan cu ta inspira nos chikitonan pa bira loke nan ta desea. E maestro ta carga e responsabilidad pa inspira nan pa haya  interes y sea activo den nan actividadnan diario. Duna e chikitinnan e espacio pa pensa pa nan mes y guia nan. Ora nan ta sigur di nan mes spiritualmente, nan lo tin recurso infinito y hopi gana pa siña y esaki lo trece cu ne cu nan logro lo ta inmenso. Inspiracion ta keda un yabi importante pa educacion di nos muchanan.”