Vragen? +297-524 3100 info@ipaaruba.com

Studiantenan di Movecion y Salud cu kamp di inspiracion y motivacion

Recientemente, e studiantenan di prome aña di e estudio di Movecion y Salud (MyS) a participa na e asina yama Land Kamp Movecion y Salud 2018. E team di docente di MyS a prepara un programa extenso y activo pa tres dia largo. E meta primordial di e kamp tabata pa e studiantenan di prome aña cera conoci cu otro. Alabes pa nan conoce e team di docente di MyS y conoce e studiantenan di MyS cu actualmente ta den nan ultimo fase di estudio na IPA, pa scucha nan experencia na IPA y conseho p’asina nan tambe por tin exito den nan estudio.

E kamp a tuma luga den naturalesa. Di e manera aki, e studiantenan ta experencia kico tur e naturalesa di Aruba tin pa ofrece. Sin laga afo cu naturalesa ta un di modulonan cu ta forma parti di e curiculo di MyS, di cua den futuro e studiante lo duna les di naturalesa na scolnan primario. E kamp tabata consisti di diferente actividad di teambuilding cu e meta pa kibra ijs entre e studiantenan y crea asina tambe e sentido di union den e klas. E actividadnan tabata, entre otro: core 28 km total riba bais y percura pa tur persona cu ta forma parti di e grupo yega hunto final. Ademas di esaki, e studiantenan a subi Hooiberg y participa na les di yoga di docente Leontine, di cua nan a siña diferente tecnica di movecion den duo of grupo. Banda di esaki nan, nan a cana den e mangelnan bou di brug di Fransepas. E aventura a caba cu un ‘kampvuur’ . Aki tanto e studiante- como e docentenan a haya oportunidad pa reflexiona tocante e kamp, inspira y motiva otro pa cuminsa e aña academico cu hopi energia y positivismo, p’asina bira docentenan ehemplar cu ta contribui na desaroyo y cultura di nos muchanan.

Un palabra di gratitud ta bay na Price Smart, ASD y Aruba Trading Company cu a contribui masalmente na Land Kamp Movecion y Salud 2018. Masha danki pa e gran aporte na e proyecto aki cu ta yuda cu e formacion di nos futuro educadornan. Alabes IPA ta desea e studiantenan hopi sabiduria, bon motivacion, gran perseverancia, hopi creatividad y inspiracion p’asina 2018-2019 bira un aña escolar exitoso.