Vragen? +297-524 3100 info@ipaaruba.com

DEA a tene encuentronan cu cabesantenan di SKOA y DPS tocante SAM

Minister di Enseñansa recientemente a anuncia e plan di implementacion di Scol Multilingual den tur scol preparatorio y basico na Aruba. E implementacion aki lo bay segun 4 fase cu ta orientacion, preparacion, ehecucion y mehoracion.

Encuanto e implementacion aki, Departamento di Enseñansa Aruba (DEA) su seccion Guia (Begeleiding) a organisa varios presentacion na directiva di scolnan di Aruba. Despues di e presentacionnan aki a surgi varios pregunta for di “veld” tocante e implementacion ariba menciona. Basa riba e preguntanan cu a surgi directiva SKOA (Stichting Katholiek Onderwijs Aruba) y DPS (Dienst Publieke Scholen) a start cu encuentronan informativo cu su cabesantenan.

Na dicho encuentronan a trata varios topico e. o.

  • e resultado desea pa cu e cambio
  • ki tipo di alumno kier logra na final di scol basico
  • con e implementacion ta hinca den otro (e 4 fasenan, nan enfoke y meta, e sosten di parti di directiva, incluso e scolnan piloto, Departamento di Enseñansa y IPA, e contenido di curiculo, e pedagogia y didactica nobo y e liderasgo necesario)

E cabesantenan tabata tin e oportunidad pa haci varios pregunta y alabes nan a logra haya hopi contesta ariba nan preguntanan. Entre e preguntanan cu a surgi tabata tin pregunta tocante e material, personal, e experencia di e piloto SML, e curiculo, e pedagogia y didactica nobo y e profesionalisacion. Encuentronan asina aki ta hopi importante pa cu un implementacion asina grandi. Encuentronan asina ta trece varios informacion dilanti pa aclarea cualkier inquietud cu por tin y alabes por yuda compronde e cambio mihor y traha hunto pa e inovacion ta uno exitoso.

Departamento di Enseñansa Aruba (DEA) kier tuma e oportunidad aki pa yama danki na SKOA y DPS pa nan sosten.

Pa mas informacion por acudi na e website di DEA [www.ea.aw] y por sigui e desaroyonan a traves di facebook page @educationaruba.