E aña aki Minister di Enseñansa, dr. Armando Lampe a anuncia cu Aruba lo conoce un cambio den enseñansa; ta trata di implementacion di Scol Multilingual den tur scol preparatorio y basico na Aruba.
Scol Multilingual ta un sistema di educacion indispensabel pa Aruba, teniendo cuenta cu nos comunidad ta multilingual. Multilingualismo ta un rikesa y un oportunidad cu nos comunidad ta brinda y cu lo mester tin su refleho tambe den scol.
dioma ta manera un yabi cu ta habri posibilidad pa por comunica y asina desaroya. Pues mas idioma bo siña, mas yabi bo tin pa desaroya bo mes den e mundo di awe. Un persona multilingual tin un capacidad mas grandi di compronde loke ta pasa rond di dje, pasobra e por aplica su conocemento di un idioma pa otro.
Censo (2010) ta mustra cu gran mayoria di nos poblacion ta papia Papiamento cu otro na cas (casi 70%), sigui pa 14% di nos poblacion cu ta papia Spaño, 7% cu ta papia Ingles y 6% cu ta papia Hulandes cu otro na cas.
Aunke cu desde aña 2003 Papiamento y Hulandes ta e idiomanan oficial na Aruba, nos por mira cu nos muchanan tin un habilidad tremendo di siña Ingles y Spaño hopi lihe na cas, sin cu nan a haya les di e idiomanan aki na scol.
Un persona multilingual ta transferi loke el a siña den un idioma pa otro idioma. Esaki ta crea un base fuerte den e idioma cu e alumno conoce bon, y ta brinda beneficio pa siña otro idioma cu e tin dificultad cu ne.
Asina por ehempel bon dominio di Papiamento, cu ta un idioma cu e alumno ta scucha cu mas frecuencia na Aruba, ta un condicion pa bon dominio di Hulandes, cu ta menos conoci pa mayoria di nos muchanan.
Pa mas informacion por bishita e website di DEA www.ea.aw y e pagina di facebook SAM pa por sigui e ultimo desaroyonan.